Moordverdagte vra borg om vir sy kinders te sorg

Update

MOSSELBAAI NUUS - Die 30-jarige verdagte wat in hegtenis geneem is in verband met die moord op 'n man van Hartenbos, Desmond Share (53) het vandag in die Mosselbaai-landdroshof om borgtog begin aansoek doen.

Die verdagte, Shadreck Mhetu is reeds in Augustus 2023 in hegtenis geneem en het aanvanklik aangedui dat hy nie om borgtog wil aansoek doen nie.

In November 2023 het hy egter aangedui dat hy wel wil borgtog kry.

Omdat hy oorspronklik van Zimbabwe is, het die hof 'n tolk nodig om die prosedures te verduidelik en die saak is intussen weer uitgestel omdat daar tydens sy vorige verskyning nie 'n tolk beskikbaar was nie.

Share, 'n plaaslike sakeman, se liggaam is op Saterdag, 5 Augustus, tussen bosse naby Albertinia gekry, nadat hy vir dae lank vermis was. Sy bakkie is gesteel en is etlike dae ná sy moord op Ficksburg naby die grens van Lesotho gevind.

Share het veelvuldige beserings opgedoen. Geld is ook uit sy bankrekening onttrek.

Mhetu is kort na die voorval in hegtenis geneem in Du Noon in Kaapstad en staar aanklagte van moord, ontvoering en kaping in die gesig.

Twee mans wat destyds naby die grens in Share se bakkie gevind is, is in hegtenis geneem maar word nie met die moord verbind nie.

Nóg 'n lasbrief is op 12 Desember deur die Mosselbaai-landdroshof uitgereik vir die inhegtenisname van Danzel Talent Alkulethi, ook bekend as Akwiriano, wat glo by Share se verdwyning betrokke was en nog twee verdagtes, Shown Gondo (31) en sy broer, Akim Gondo (25), ook Zimbabwiers, is steeds op vrye voet.

Getuienis
Mhetu het Maandag getuig dat hy borgtog wil hê omdat hy vir sy vrou en twee kinders, wat volgens hom in Kaapstad woon moet sorg.

Hy het gesê hy het 'n werk gehad by 'n konstruksiemaatskappy op Mosselbaai en dat hy graag daarheen sal wil terugkeer.

Die staat het vir hom gevra of hy nog met sekerheid kan sê dat hy wel nog 'n werk het, aangesien hy maande laas daar was.

Mhetu het een vorige veroordeling en dit was omdat hy onwettig in Suid-Afrika was in 2014. Die staat het ook sy woonadres bevraagteken omdat hy verskillende adresse verskaf het en voer aan hy is 'n vlugrisiko.

Die saak is uitgestel na 4 April sodat die ondersoekbeampte in die borgaansoek kan getuig.

Vorige artikels:

‘Ons bring jou die nuutste Tuinroete, Hessequa, Karoo nuus’