Video
MOSSELBAAI NUUS - “Dit gaan op hierdie stadium regtig baie, baie goed met my!” sê Hoërskool Punt-onderwyser Rudolf Botha.
Botha ondergaan tans rehabilitasie in Kaapstad vir tydelike verlamming van sy bene ná ’n operasie om ’n gewas op sy spinale koord te verwyder.
“Vordering is duidelik sigbaar, maar ek moes leer dat dit nie noodwendig so vinnig gaan wees soos wat ek gehoop of gedink het nie.
“Die rehabilitasiesentrum is ongelooflik en die personeel is great. Hulle kyk regtig baie mooi na my en druk met die nodige ondersteuning om te verseker ek vorder soos ek moet.”
Hy is nou al drie en ’n halwe weke by die sentrum. Toe hy daar aangekom het, kon hy skaars sy linkervoet se tone beweeg, en regs nóg minder. “Nou skop, trap, swaai en buig ek al beide kante. Die spiere is nog net ’n bietjie swak, maar sal met tyd sterker raak. Hulle is regtig opgewonde oor my vordering.”
VIDEO: Só gaan mnr Rudolf Botha se vordering
Hy het ook hierdie week met swembadsessies begin, waaroor hy baie opgewonde is. “Ek wil regtig vir elke persoon, of hulle nou van Kaapstad, Mosselbaai of oor die water is, wat vir my boodskappe gestuur het, gebel het of sommer in persoon hier ingestap het en ons gesin so gebless het, uit my hart bedank.”
Mnr. Rudolf Botha is positief oor sy vordering.
Punt se eerste hokkiespan, wat in die Kaap op toer is, het ook by hom gaan inloer.
Botha sê ook ná Mossel Bay Advertiser se eerste artikel oor sy pad na herstel het hy nóg ’n spesiale besoeker gekry. “’n Oudleerder van my, wat 15 jaar gelede in my klas was en nou in Kaapstad woon, het dit gelees en hier by my opgedaag. Haar woorde was: ‘Meneer, jy het so baie vir my beteken, nou kan ek vir jou iets beteken.’ Dit was ’n wow-oomblik!
“Die Here se genade is groot en julle maak die reis daagliks vir my moontlik. Die Botha-gesin waardeer dit regtig so baie! Laastens wil ek graag vir dr. Herman van Heerden, dr. Anneline Matthee (Hartenbos) en Frontier Medix (ambulansdienste van George) bedank vir die groot rol wat julle in my reis tot hier gespeel het!”
Botha het die Advertiser-span ook bedank en gesê hy kom beslis by die koerant inloer wanneer hy by die rehabilitasiesentrum uitstap.
Vorige artikel:
