MOTOR NUUS - As gevolg van dié alomvattende veiligheidsarsenaal het die nuwe Vitara 'n volle vyf sterre in die jongste, streng EuroNCAP-botsingstoetse behaal.
"Die heeltemal nuwe Suzuki Vitara is 'n mylpaal vir Suzuki," sê Yuko Sato, besturende direkteur van Suzuki Auto Suid-Afrika. "Dit versinnebeeld die kernwaardes van die oorspronklike baanbreker-Vitara, maar wend hulle binne die raamwerk van 'n heeltemal nuwe, uiters modern meerdoelvoertuig aan wat aan die die behoeftes van die hedendaagse motorryer voldoen.
"Daarom is die nuwe Vitara nie net veelsydig en prakties nie, maar spreek ook sleuteleienskappe soos suinige brandstofverbruik, doeltreffendheid en veiligheid meer volledig as ooit tevore aan.
"Die gevolg is 'n oortuigende kompakte meerdoelvoertuig wat nie net onder bestaande Suzuki-geesdriftiges sal aanklank vind nie, maar ook nuwe klante na die Suzuki-handelsmerk sal lok," het Sato afgesluit.
Die nuwe Vitara se splinternuwe ontwerp weerspieël dat dit eg-Suzuki is. Die nuweling is baie kompak: 4 175 mm lank, 1 775 mm breed en 1 610 mm hoog, met kort bakoorhange en 'n asafstand wat relatief lank is. Die gevolg is 'n voertuig wat rats en beweeglik lyk.
Van voor oorheers Suzuki se kenmerkende toevou-enjinkapontwerp, wat 'n soliede indruk skep. Die prominente sierrooster, met sy dubbelstrookontwerp, koppel die enjinkap ook vi-sueel aan die onderste luginlaat.
Die small kopligte, met hul deursigtige lense, kleurbypassende buffers, diep misligte (behalwe op die GL-intreevlakmodel) en dagryligte is almal mooi voor geïntegreer, terwyl die kort voorste bakoorhang en verhoogde rithoogte die voertuig hope selfversekerdheid gee.
Die kort bakhoorhange sorg hulle vir aanval- en vertrekhoeke van 18,2 grade en 28,2 grade onderskeidelik, terwyl die knakhoek 17,7 persent beloop. Die Vitara se minimum-grondvryhoogte is 185 mm.
Doeltreffende lugdinamika is danksy die nuweling sê glad gevormde bufferopeninge, die gladde skutpaneel onder die voertuig en die gladde profiel van die buitespieëls en die voorste buffer.
Die nuwe Vitara stel ook drie nuwe kleure bekend - Atlantis Turkoois-pêrelglansmetaal, Horison Oranje-metaal, en Savannah Ivoor-metaal. Daarbenewens kan die dak en sierrooster na gelang van model en kleur in kontrasterende kleure bestel word.
Die moontlikhede om die Vitara aan te pas volgens persoonlike styl en voorkeur is legio danksy 'n keuse van agt bakkleure, vier dakkleure en drie sierrooster-afwerkings (swart, wit en chroom).
Die Urban-pakket behels verchroomde mislig-hulse, subtiele sierstroke op die sykante en 'n dakvlerk, terwyl die Rugged-pakket meer ooglopende skutplate voor en agter, groter sierstroke, kontrasterende mislighulse en laaibakbeskerming bied.
Die kajuit is ruim en gerieflik, met 'n uitgebreide lys weelde- en veiligheidskenmerke wat al vyf Vitara-modelle in die reeks geld.
'n Gebruiksvriendelike uitleg en tasbare gehalte is sleutelkenmerke en daar is oral onverwagse bergplekke wat ook vir meer ruimte sorg.
Die skoon ontwerp van die instrumentepaneel plaas die klem op die instrumentehuls reg voor die bestuurder, terwyl 'n middelkonsole 'n tuis-te aan die kontroles vir die lugversorging en die klankstelsel bied. Die rathefboom word in 'n U-vormige paneel tussen die voorsitplekke gehuisves.
Die MP3/WMA-versoenbare klankstelsel met tot ses luidsprekers sluit 'n CD-speler en FM/AM-radio in, asook USB-koppeling. Geïntegreerde Bluetooth-koppeling sorg ook vir veilige selfoongesprekke op die pad.
Die stuurwiel kan vir reikafstand en hoogte verstel word, en is na gelang van model met meerfunksie-kontroles vir die klankstelsel, selfoonkommunikasie, togsnelheidsbeheer en snelheidsbeperker toegerus.
Albei sitplekke voor is hoogteverstelbaar, terwyl die banksitplek agter 60/40 verdeel is en gedeeltelik of heeltemal platgevou kan word om 'n veelsydige kombinasie van sitplek en laairuimte te bied.
Toegang tot die bagasieruim is gerieflik, danksy 'n groot luikdeur wat tot op buffervlak oopmaak. Die groot laairuimopening is 1 120 mm wyd en 730 mm hoog, wat die laai van groot voorwerpe maklik maak. Die Vitara se bagasieruim bied 375 liter laairuimte met die agterste sitbank in die gewone posisie, maar kan tot 710 liter vergroot word deur die rugleuning plat te vou. 'n Laaruimpaneel kan gebruik word om die laairuim vir meer veelsydige gebruik te verdeel.
Die binneruim van die nuwe Suzuki Vitara kan na gelang van persoonlike smaak en behoefte aangepas word deur elemente soos die sierstrook van die instrumentepaneel, die luguitlate en die horlosie met kontras-
terende kleuraksente te voorsien.
Die nuwe Vitara word deur Suzuki se jongste M16A-petrolenjin aangedryf. Die viersilinder-eenheid van 1,6 liter is ontwerp om optimale kraglewering en brand-stofdoeltreffendheid te behaal deur die gebruik van 'n verskeidenheid maatreëls en tegnologieë wat onder meer wrywing aanspreek en die massa van interne komponente verlaag.
Hoewel dieselfde kragbon vir die hele Vitara-modelreeks ingespan word, het voornemende kopers die keuse van 'n vyfgang-handratkas of 'n outomatiese sesgangratkas. Die handratkas bied optimale ratverhoudings wat op beide ekonomiese brandstofverbruik en verrigting gemik is, terwyl 'n teengewig vir 'n gladde, positiewe ratskakelaksie sorg.
Die outomatiese sesgangratkas bied 'n selfs wyer verskeidenheid verhoudings wat beter wegtrekreaksie en laer enjintoere op die oop pad tot gevolg het.
Twee van die vyf modelle in die reeks met Suzuki se jongste-geslag AllGrip-viertrekstelsel toegerus. Die stelsel is spesifiek vir gebruik in die Vitara aangepas, en bied vier bestuurmodusse. Dit sorg vir werklike veelterreinvermoë sonder om brandstofverbruik te benadeel.
Die AllGrip-stelsel gebruik 'n terugvoerfunksie om wringkrag aan die agterwiele oor te dra wanneer die voorwiele traksie sou verloor.
In die Sport-modus word AllGrip ingespan om vasvoetige hantering op kronkelpaaie te bevorder deur vierwielaandrywing aan versnellerinsette te koppel. By matige enjintoere word die wringkrag relatief to die versnelleraksie aangepas om te sorg dat die kraglewering tot die Vitara se klouvermoë om draaie bydra.
Die Sneeu-verstelling kan inge-span word wanneer daar besonder min traksie is, soos byvoorbeeld in baie modderige toestande. Vierwielaandrywing word dan deurgaans benut, terwyl trekkrag en stabiliteit voorkeur geniet, gegrond op stuur- en versnellerinsette.
Laastens is daar die Sluit-modus, wat 'n ewenaar met beperkte gly gebruik om die wiel wat tol te rem, sodat die beskikbare krag aan die wiele oorgedra word wat nog trekkrag het.
Die AllGrip-stelsel word met 'n hellingbeheerfunksie aangevul wat die snelheid waarteen daar by steil afdraandes afgery word beperk en beheer, om so te sorg dat die bestuurder in beheer bly.
Die nuwe Suzuki Vitara het 'n uitgebreide reeks aktiewe en passiewe veiligheidstelsels. Die aktiewe stelsels sluit elektroniese stabiliteitsbeheer en ABS-sluitweerremme met elektroniese remkragverspreiding en elektroniese rembystand in.
Wat passiewe stelsels betref, spog die Vitara met sewe lug-sakke (twee lugsakke voor, twee sylugsakke en twee gordynlugsakke, asook 'n knielugsak aan die bestuurderskant). 'n Stelsel wat die rempedaal in die geval van 'n botsing ontkoppel om beserings te vermy, is ook ingesluit. Die sitplekgordels voor is boonop met voorspanners en lasbeper-kers toegerus.
Wat voetgangerveiligheid betref, is die vorm van die enjinkap, die tussenkap, die ruitveërs en die buffers almal ontwerp om die impakkragte te absorbeer indien 'n botsing met 'n voetganger sou plaasvind.
Die bakstrukture van die nuwe Vitara weerspieël Suzuki se Totale Effektiewe Beheertegnologie, wat spesifiek daarop gemik is om die impak van 'n botsing te absorbeer en voertuigmassa te verminder. Die uitgebreide gebruik van ultrahoësterkte staal dra verder tot die Vitara se botsingsveiligheid by.
Die Vitara is in die jongste Euro-NCAP-botsingstoetse met vyf sterre bekroon.
Die nuwe Suzuki Vitara-reeks bestaan uit vyf weergawes in drie spesifikasievlakke, met 'n keuse van twee ratkaste, en tweewiel- of vierwielaandrywing. Dieselfde enjin van 1,6 liter word deurgaans ingespan.
Die Suzuki Vitara 1.6 GL is die bekostigbaarste lid van die nuwe Vitara-reeks, maar bied steeds 'n uitvoerige lys kenmerke, vermoëns en funksies. Dié model koppel Suzuki se M16A-viersilinderenjin van 1,6 liter aan 'n vyfgang-handratkas en voorwielaandrywing.
Twee Vitara-modelle is met die GL+-spesifikasievlak beskikbaar. Albei koppel die M16A-enjin van 1,6 liter aan 'n vyfgang-handratkas, maar die verskil is die aandryfstelsel: een weergawe is voorwielaangedrewe, terwyl die ander een met die AllGrip-stelsel toegerus is.
Die GL+ kan ook met 'n tweekleurskema bestel word, met die dak in 'n kontraskleur. Die model het elektriese kantruite agter, snelheidbeheer met kontroles op die stuurwiel en outoma-tiese klimaatbeheer.
Die bagasieruim kry 'n bykomende verdeelbord wat toelaat dat die bagasiebak meer veelsydig benut kan word, asook 'n 12V-kragpunt en 'n bagasieruimliggie. Die AllGrip-weergawe van die GL+ het 'n bestuursmodus-skakelaar naby die rathefboom in die middel.
Die twee GLX-weergawes is die topmodelle in die nuwe Vitara-reeks.
Die voorwielaangedrewe GLX is met 'n outomatiese sesgang-ratkas met stuurwielskakelspane toegerus, terwyl die GLX-model met AllGrip die vyfgang-handratkas behou.
Buite is allooiwiele van 17" duim wat met 215/55 R17-bande toegerus is. 'n Panoramiese oopskuif-glassondak is ook ingesluit. Die dak word elektries beheer met 'n blinding binne.
Die sierrooster en die bakversierings aan die onderpunt van die A-pilaar is verchroom en kopligte het LED-eenhede en LED-dagryligte.
Deftige Sweedse leerbekleedsel binne en parkeersensors voor en agter is deel van die GLX-pakket, asook hoofligte wat outomaties aanskakel.
Die Suzuki Vitara-reeks word deur 'n volledige waarborg van drie jaar of 100 000 km gerugsteun, terwyl 'n vier jaar of 60 000 km diensplan, en padnoodbystanddiens van drie jaar ook ingesluit word. Diensintervalle is elke 15 000 km. Pryse: 1.6GL 5MT - R239 900; 1.6 GL+ 5MT - R269 900; 1.6 GL+ 5MT ALLGRIP - R 291 900; 1.6 GLX 5MT ALLGRIP - R319 900; 1.6 GLX 6AT - R299 900.
Duidelike instrumente met genoeg inligting en elektroniese hulpmiddels is logies georganiseer en binne bereik.
'Ons bring jou die nuutste George, Tuinroete nuus'
