GROOT-BRAKRIVIER NUUS - 'n Somber atmosfeer het geheers toe die Wes-Kaapse minister van gemeenskapveiligheid, Dan Plato, Woensdag, 12 Augustus die toneel in Powertown waar die liggaam van die 17-jarige Lesley-Ann Maya in April vanjaar gevind is, besoek het.
Na aanleiding van nóg 'n liggaam, dié van die 16-jarige Bonique Jansen, wat enkele maande daarna ook duskant Powertown gevind is - het Plato sy Vrouemaand verrigtinge in Mosselbaai afgeskop.
Drie leerders van die Groot-Brakrivier Sekondêre Skool is in 'n tydperk van agt maande vermoor. Plato het 'n blommekrans gelê by 'n kruis op die plek waar die 17-jarige Lesley-Ann Maya se liggaam tussen riete gevind is. Op die kruis staan die woorde: 'Ons mis jou'.
Lesley-Ann se ouma, Lena Williams, wat op haar liggaam afgekom het, het gehuil toe Plato die families toegespreek het. Terwyl hy Williams getroos het, het hy verwys na die afgelope Jeugdag en die feit dat 16 dae van aktivisme teen geweld teen vroue en kinders om die draai is.
"Die regering reik uit na die gemeenskap omdat ons nie moet ophou om die boodskap te bring dat ons nie gaan stilbly nie."
Plato het gesê daar is geen rede hoekom 'n vrou verkrag of vermoor kan word nie en het bygevoeg dat vroue meesters is om mombakkies te dra deur altyd te sê dat dit goed met hulle gaan.
"Vroue en gemeenskappe durf nie stilbly oor hierdie tipe misdaad nie, want dit eindig in die dood." Plato het daarna verwys dat Lesley-Ann se liggaam 'n hanetree van haar huis gevind is en dat dit onmoontlik is dat niemand eenvoudig niks kon gesien of gehoor het nie.
"Daar moet mense wees wat weet wat aangaan en die gemeenskap moet praat."
'n Beloning van R5 000 word aangebied vir enige inligting wat kan lei tot 'n arrestasie. Die polisie volg tans leidrade op.
Indien jy oor inligting beskik, kontak Speurder Tekkie van Rensburg by 083 303 8100.
Minister Dan Plato vertroos Lesley-Ann Maya se ma, Remona Maya (links), Bonique se ma, Marchelle Jansen (agter) en Lesley-Ann se ouma, Lena Williams.
'n Kruis met die woorde, 'Ons mis jou', is neergesit op die plek waar Lesley-Ann Maya gevind is.
Lees vorige artikels hier:
- Groot Brak-tienermoord: Bonique glo verwurg
- Nog geen arrestasies in Powertown-moorde
- Minister op pad na Powertown ná moorde
- Roudiens vir 3 vermoorde tieners
- Inwoners kom op lyk af
- Gemeenskap leef in vrees.
- Urgent community meeting after body found
- Opvolg: Tienermeisie se oorskot gevind
- Nòg 'n tiener uit Powertown vermis
- Nog 'n tienermeisie vermis
Minister Dan Plato lê 'n krans neer by die kruis wat vir Lesley-Ann Maya neergesit is, op die gebied waar haar lyk gevind is. Haar hartseer ouma, wat ook op haar liggaam afgekom het, Lena Williams kyk toe. Regs, in rooi, staan die ouma van Bonique Jansens, Maria Arendste.
ARTIKEL EN FOTO: LOUISE KARSTEN, MOSSEL BAY ADVERTISER - JOERNALIS
'Ons bring jou die nuutste Mosselbaai, Tuinroete nuus'
