TUINROETE TENNIS-NUUS - Die eersteligaspan van die George-tennisklub het sy onoorwonne status in die 2019 gemengde ligakompetisie van die Eden-tennisvereniging behou toe hy die span van die Wesbank-tennisklub Saterdag, 9 Februarie op Oudtshoorn in 'n wedstryd wat puik tennis opgelewer het met 4-2 geklop het. Wesbank het goed begin toe Jacques de Beer en Christine van Coller vir Charl Opperman en Karin Deltenre in drie stele, 6-3, 4-6, 6-4 geklop het.
George het sake egter gelyk gemaak toe Helgard Muller en Jackie Jones vir Pietman Schoeman en Rida Bester met 6-0, 6-3 verslaan het.
Die twee plaasvervangers van Wesbank, Paul Fourie en die 14-jarige Patricia Esterer het goed vertoon in hul kragmeting met Willie Breytenbach en Sonja Botha maar met 3-6, 3-6 die onderspit gedelf.
Die wedstryd tussen die eerste gekeurdes, De Beer en Van Coller van Wesbank en Muller en Jones van George is deur laasgenoemde paar met 6-3, 6-3 gewen wat aan die besoekers 'n wen-voorsprong van 3-1 besorg het.
Pietman Schoeman en Rida Bester het Wesbank 'n kans gegee om sake gelyk te laat trek deur vir Willie Engelbrecht en Sonja Botha met 6-2, 6-4 te klop maar Charl Opperman en Karin Deltenre was te sterk vir Paul Fourie en die jong Esterer. Hulle het met 6-3, 6-2 gewen om aan George die oorwinning te besorg.
Helgard Muller.
Die tennisspanne van Wesbank en George is voor van links Sonja Botha, Christine van Coller, Karin Deltenre, Patricia Esterer, Jackie Jones en Rida Bester. Agter staan Pietman Schoeman, Helgard Muller, Jacques de Beer, Charl Opperman, Paul Fourie en Willie Breytenbach.
'Ons bring jou die nuutste Tuinroete nuus'
