MOSSELBAAI NUUS - Om as Gholfspeler van die Jaar gekroon te word is nie 'n geringe prestasie nie, veral as jy dit twee opeenvolgende jare kon vermag.
Danie van Langelaar is nie net 'n gesoute liga-speler nie, maar ook 'n speler wat week na week altyd sy beste gee.
Om die gesogte titel te verower moet jy op 'n deurlopende basis bestendige gholf speel, want reg deur die jaar word punte toegeken vir elke individuele kompetisie. Noël Domingo en klubkaptein Gavin Reynolds was waardige teenstanders en het onderskeidelik tweede en derde geëindig. Wel gedaan Danie, maak dit drie in 'n ry!
Die vierbal alliansie kompetisie wat op Woensdag, 15 Julie die manne laat stokke swaai het, het weer eens bewys dat gholf 'n wonderlike spel is in die opsig dat die voorgee-stelsel die pad gelyk maak vir alle deelnemers. Veterane soos Paul Gouws (voorgee 22), Robert Strydom (voorgee 23), Erhardt Veldsman (voorgee 24) en Joe Luggen (voorgee 17) se 94 punte het hulle laat koning kraai oor 'n groot aantal lae voorgeespelers.
Die vierbal van die pa-en-seun kombinasie Fanie en Stefan van Vuuren, asook Anton (snr) en Anton Izaakse (jnr) het ook 94 punte aangeteken, maar na die uittel het die veterane bo geëindig.
Nog 'n pa-en-seun kombinasie, Alwo en Wouter Dercksen, asook Adriaan Maarschalk en Ricus Oosthuizen het op 92 punte derde geëindig.
Saterdag, 18 Julie se kompetisie is afgelas weens die reënweer wat veral gedurende die oggend uitgesak het. Die middag het heerlike weer opgelewer en 'n hele klomp spelers het voor die rugby ons mooi baan kom geniet.
Louis Oosthuizen
Mosselbaaiers het Maandag vasgenael voor die televisie gesit en met trots aanskou hoe Louis Oosthuizen by St Andrews met die wêreld se beste gholfspelers kragte meet. Louis se tweede plek in die Ope het weer getoon dat sy naam met trots by Suid-Afrika se beste spelers oor baie jare gevoeg kan word. Mosselbaai Gholfklub is met reg trots om Louis as ere-lid by ons klub te mag hê.
Warmer weer en heerlike gholf word al ons lede en besoekers toegewens.
Woensdag se wenners: (agter) A Dercksen, S van Vuuren, F van Vuuren en A Izaakse. Voor: E Velsman en A Izaakse.
'Ons bring jou die nuutste Mosselbaai, Tuinroete nuus'
