MOSSELBAAI NUUS - Die sesde jaarlikse Burgemeester-gholfdag het op Vrydag, 13 September, by die Mosselbaai Gholfklub plaasgevind en is met 'n bofhou deur Franna Ferreira, 'n talentvolle plaaslike gholfspeler, ingewy.
Persoonlik uitgenooi deur die burgemeester van Mosselbaai, het Franna die dag se verrigtinge begin met 'n sterk swaai van sy stok, aan hom oorhandig deur sy trotse pa, Pieter Ferreira.
Franna het spastiese diplegie, 'n vorm van serebrale gestremdheid. Hy is ook op die outisme-spektrum.
Die burgemeester het Franna by 'n funksie vir gestremdes ontmoet, waarin bespreek is hoe Mosselbaai meer toeganklik gemaak kan word vir diegene met gestremdhede, en die burgemeester het hom genooi om dié gholfdag amptelik te open.
Franna behoort nie aan ’n gholfklub nie, maar oefen gereeld saam met sy pa.
Diegene wat aan die dag deelgeneem het, insluitend burgemeester Dirk Kotzé, het almal opvallende pienk T-hemde gedra.
Wêreldrekord poging
Lukas Korff het ook die dag bygewoon en gepoog om 'n bestaande wêreldrekord te verbeter. Die rekord wat deur Korff gejaag is, was om op 'n afstand van 250m 'n bofhou direk uit die lug te probeer vang.
Dié poging het om 16:00 in aanvang geneem, maar sterk winde en klompie moeë gholfspelers kon nie naastenby daarin om enige van hul bofhoue binne bereik van Korff te slaan om dit te vang nie.
Dié poging was deel van 'n projek om verdere fondse vir die Burgemeestersfonds in te samel en ofskoon die poging onsuksesvol was, was dit steeds vir 'n goeie doel.
Skrywer en prediker
Korff is 'n 19-malige wêreldrekordhouer, skrywer en prediker.
Hy sê: “Ek is eerstens ’n evangelis en gebruik my mal lewenservarings en wêreldrekords om mense te motiveer om na ’n beter en verbeterde lewe te streef. Ek werk hard om ander te inspireer om die woord te deel, deur die kragtige beginsels te gebruik wat ek geleer het in die proses om op verskillende wêreldrekords te verbeter.”
Die Burgemeester-gholfdag word aangebied as 'n fondsinsameling vir die Burgemeestershulp- en liefdadigheidsfonds, wat vir verskeie projekte aangewend word.
Van die projekte sluit in om die gemeenskap op te hef, om jongmense finansieel by te staan wat gekies word om hul skool op provinsiale vlak te verteenwoordig en om in die geval waar 'n huis byvoorbeeld afgebrand het, die familie by te staan om te voorsien in basiese behoeftes.
‘Ons bring jou die nuutste Tuinroete, Hessequa, Karoo nuus’
