'Hy het altyd mense laat lag': Familie bring hulde aan Griffen Davids

Update

GROOTBRAK NUUS - Griffen Davids (41), 'n gesinsman wat in die Wolwedans-gemeenskap bekend en geliefd was vir sy kleurvolle storievertelling en uitstekende timmervaardighede, is geïdentifiseer as die man wat verlede Vrydag, 24 Julie, in die voertuigbotsing by Groot-Brakrivier omgekom het.

Sy familie het aan Mossel Bay Advertiser vertel dat Davids saam met 'n paar ander mense agter op 'n Bantam-bakkie gereis het toe die voertuig by die kruising van die R102 en Stasieweg in Groot-Brakrivier met 'n vragmotor gebots het.

Hy was op pad huis toe na sy lewensmaat van meer as 'n dekade, Veronique Manual, en hul twee jong seuns, Theodore (5) en Waydon Manual (2).

'n Polisiewoordvoerder van die Suid-Kaap, AO Chris Spies, het gesê die botsing het kort ná 15:30 plaasgevind. Davids is op die toneel dood verklaar, terwyl ses ander mense, wat vermoedelik saam met hom agter op die bakkie was, ligte beserings opgedoen het.

'n Saak van strafbare manslag word deur die Groot-Brak-polisie ondersoek, en die ondersoek na die oorsaak van die botsing duur voort.

Griffen Davids was ’n gesinsman. Foto: Verskaf

Griffen se ma, Emily, sy niggie, Chanel Booysen, en sy tante, Sophia Booysen, het gesê Griffen was altyd vrolik, altyd aan die lag of besig om ander aan die lag te kry.

Hy het daarvan gehou om met mense te gesels, of dit nou familie, vriende of iemand was wat hy pas ontmoet het.

"Hy het naby gewoon en sou gereeld inloer vir 'n vinnige geselsie. Op Sondae het hy saam met sy lewensmaat en hul twee seuns kom kuier vir ons familiedag," het Emily gesê.

Griffen het in Groot-Brakrivier groot-geword. Hy het by Groot-Brak Primêr en Groot-Brak Sekondêr skoolgegaan, waarna hy as timmerman gekwalifiseer het.

Griffen en sy seun Theodore met sy eerste verjaarsdag. Foto: Verskaf

"Hy was regtig lief vir sy werk, en hy was baie goed daarin. Hy het baie houtwerk vir mense in en om Groot-Brakrivier gedoen. Ná sy dood het soveel mense na die huis gekom om hul medelye te betoon en te vertel van die houtwerk wat hy vir hulle gemaak het.

"Ons kon nie glo hoeveel mense daar was nie. Dit was baie besonders om te sien," het Chanel gesê.

Sy het bygevoeg dat Griffen nie net mense laat lag het nie, maar ook 'n vredemaker was. As daar onenigheid tussen familielede of vriende was, was hy gewoonlik die een wat gehelp het om dit uit te sorteer.

Griffen word oorleef deur sy ma, sy niggie en tante, sy twee seuns en lewensmaat, sy tweelingbroers, Keagan en Keanan (24), en sy suster, Bianca Abrahams (32).

Sy pa is etlike jare gelede ook in 'n motorongeluk oorlede.

Sy begrafnis sal volgende Saterdag, 8 Au-gustus, by die AGS Kerk in Greenhaven, Groot-Brakrivier, plaasvind.

Griffen se seuns, Theodore en Wayden. Foto: Verskaf