MOSSELBAAI NUUS - Die 19-jarige Caleb Swanepoel van Prins
Albert is een van twee jong mans wat in Junie haai-aanvalle aan die Suid-Kaapse kus oorleef het.
Anders as sy mede-student van Universiteit Kaapstad, Dylan Reddering (23), wat in Plettenbergbaai aangeval is, het Caleb heelwat slegter daarvan afgekom.
Sy regterbeen is geamputeer na die haai-aanval op 27 Junie in Buffelsbaai.
'n Polisieman van Groot-Brakrivier, Kst Gavilan Green, wat op 7 Junie vanjaar ook sy regterbeen na 'n ernstige motorongeluk verloor het, het Caleb Vrydag gaan bemoedig.
"Ek het nie eens geweet wat die woord amputasie beteken het tot ek my voet en toe later my been verloor het in die motorongeluk nie," vertel Kst Gavilan, wat in die Stilbaai-polisie operasioneel ontplooi was.
Die bestuurder van die voertuig waarin hy 'n passasier was, het beheer daaroor verloor op die R305 en is steeds in 'n kritieke toestand in die hospitaal.
Volgens Green, het die Da Gamaskop Sone-bevelvoerder, Brig Gerhard Jantjies, vir die kommunikasie-beampte van die Mosselbaai-polisie, Ao Pieter Koekemoer, gevra om Green by te staan in die proses om sy amputasie te verwerk.
Koekemoer het 27 jaar gelede sy regterbeen in 'n motorfietsongeluk verloor.
"Ao Koekemoer het my Vrydag George toe geneem vir my prostese en in die gesels het ons besluit om by Caleb te gaan kuier in die George Medi-kliniek. Ons wou hom sommer gaan bemoedig." Green meen dat Caleb se positiewe lewens-uitkyk merkwaardig is.
"Jy kan sommer aan sy glimlag sien hoe positief hy is en hy kom al goed reg."
Dit sluit egter ook aan by hoe Green sy eie lewe en gestremdheid benader.
"Dat ek die ongeluk oorleef het, is vir my 'n genadekans. Ek weet nie wat in die toekoms op my wag nie, maar ek berus op God in al my beplanning. Ek is 'n positiewe mens. Ek wil my storie deel en mense bemoedig waar ek gaan."
Koekemoer beaam hoe positief Caleb onder die omstandighede is en dat die goeie onder-steuning wat sy gesin bied, 'n groot bydrae hiertoe lewer.
"Die belangrikste ding om te doen is om nie moed te verloor nie. My amputasie het my dryf-krag aangewakker en daarom is ek steeds sportief en so aktief moontlik."
Caleb is vroeër hierdie week uit die hospitaal ontslaan.
Vorige artikels:
ARTIKEL: CORNELLE CARSTENS, MOSSEL BAY ADVERTISER - JOERNALIS.
'Ons bring jou die nuutste Mosselbaai, Tuinroete nuus'
