Grondverskuiwing: inwoners win regshulp in

MOSSELBAAI NUUS, VIDEO EN KLANKGREEP - Inwoners van die woonkomplekse, Seeumeeuvlug en Tuscany Village op Mosselbaai, het besluit om regshulp in te win om te bepaal wat hulle regte is, al dan nie.

Dit volg nadat inwoners verlede week met die Mosselbaai Munisipaliteit in die stadsaal vergader het, aangesien sekere inwoners aangesê is om hulle huise teen Dinsdag, 4 Oktober, te ontruim.

'n Bestuurslid van die woonkomplekse se huiseienaarsvereniging, Attie Roos, sê eienaars en inwoners van 29 erwe in die kritieke sone het betyds hul wonings ontruim. Die ingenieursmaatskappy Kantey & Templar, in opdrag van die Mosselbaai Munisipaliteit, se geotegniese verslag dui aan dat die huise horisontaal in 'n suidoostelike rigting beweeg. Van die huise het diep krake in.

Die inwoners moet om hierdie rede vandag hul wonings verlaat.

Roos sê indien moontlik sal hulle die grondverskuiwing wil stop. "Hier is nog ander wonings in die komplekse wat nie tans deur die grondverskuiwing geraak word nie. Ons sal dus, indien dit 'n opsie is, die grondverskuiwing wil stop, maar ons ondersoek nog die moontlikhede. Ons het tans meer vrae as antwoorde." Volgens Roos wag inwoners tans om te hoor of die gebied as 'n rampgebied verklaar sal word.

Roos sê hy en ander inwoners wat nie in die hoë risiko gebied woon nie, voel in hierdie stadium veilig om in die wonings aan te bly.

"Die ander huise het geen teken van krake nie. Ons kan egter nie met sekerheid sê dat die ander huise nooit geraak sal word nie en daar hang 'n swaar atmosfeer onder die inwoners sedert die gebeure. Ons is byvoorbeeld bekommerd wanneer daar swaar reën in 'n kort tydperk val.

"Onthou, die grond is bo dalk nog stabiel maar diep onder is dit los en waterig."

Roos sê hulle het ook vrae oor die aangrensende gruisgat. "Ons krap kop daaroor. Die muur van die quarry steek uit. Ons wonder of daar nie iets daar plaasgevind het wat tog 'n invloed gehad het? Hoekom het die grondverskuiwing nie die res van Mosselbaai getref nie, hoekom net hier waar die quarry is? Dit is net 'n vraag. En ons wil graag die antwoord weet."

Volgens Roos wag inwoners tans op advies van regskenners. Waarnemende bestuurder van die Mosselbaai Munisipaliteit, Harry Hill het bevestig dat die proses aan die gang gesit is om die gebied as 'n rampgebied te verklaar. "Dit vat egter ook tyd en sedert ons vergadering met inwoners, het niks nog verander nie."

* Die huise wat tans deur die grondverskuiwing geraak word is in die woonkomplekse Seemeeuvlug en Tuscan Village. In raadstukke en die geotegniese verslag word daar na die gebied wat deur die grondverskuiwing geraak word, egter as Seemeeupark, verwys.

Kyk na 'n kort video hieronder: