MOSSELBAAI NUUS - Afgetredenes en mense wat bedags tuis is, word voor 'n uitdaging gestel - die eerste van sy soort in die Wes-Kaap, indien nie Suid-Afrika nie.
Brigadier Gerhard Jantjies, bevelvoerder van Mosselbaai se SA Polisie Da Gamaskop Groep, of Cluster soos ook daarna verwys word, daag inwoners, veral afgetredenes, uit om die polisie se oë en ore te word.
"Afgetredenes en mense wat daagliks meesal tuis is, is baie bewus van wat in hul omgewing aangaan. Hulle is ook gewoonlik die mense wat weet wat algemene praktyk in hul omgewing is.
Hulle weet naastenby hoe laat hul bure tuiskom, of die bure vir 'n naweek uitstedig is, watter voertuie hoort by watter huise, en weet gou as iets nie pluis is nie. Daarom is hierdie groep die beste mense om die polisie te help om misdaad te bekamp deur iets verdags en ongewoon aan te meld.
Verdagte optrede
"Ek het opdrag gegee dat die bevelskader van die Da Gamaskop Cluster inskakel by 'n misdaadvoorkomingsgroep op Whatsapp.
Ek doen 'n beroep op afgetredenes om verdagte optrede, misdadigheid en inligting oor misdaadvoorkoming aan die bevelskader deur te gee.
Enige inligting oor onvanpaste polisie-optrede kan ook met die relevante bevelvoerder gekommunikeer word. Hierdie inligting sal op Cluster-vlak nagegaan word om seker te maak dat alle inligting opgevolg word," het Brig Jantjies bygevoeg.
"Die inisiatief het nie ten doel om die polisie-stasies te systap nie. Klagtes moet steeds by die polisiestasie aangemeld word. Wanneer iemand egter oor inligting beskik wat kan help om misdaad te voorkom, of duidelik misdadige optrede sien, word hulle versoek om die Whatsapp-nommer te gebruik."
Die doel van hierdie inisiatief is juis om die polisie se dienslewering tot op grondvlak positief uit te brei en misdaadvoorkoming te bevorder. Dit kan egter net werk as die Whatsapp-groep vir die doel waarvoor dit ingestel word, aangewend word.
Kontak gerus die volgende offisiere in die onderskeie areas op Whatsapp direk:
Da Nova: Kapt Pio by 082 522 3337,
Heiderand: Lt Kol Haggard by 082 778 7270,
Mosselbaai Middedorp: Kapt Van Rensburg by 082 778 7304,
Mosselbaai Essenhout/Sederstraat area: Kapt September by 079 893 9941,
Groot-Brakrivier: Lt Kol Stripp by 082 522 1924,
Danabaai: Kapt Le Roux by 082 465 8293,
KwaNonqaba/Aslapark: Lt Kol Braaf by 082 778 7305,
Hartenbos: Kapt Johnson by 082 522 1581,
en
Mosselbaai landelike gebiede: Kapt Wolmerans by 082 334 7565.
Polisiewanpraktyke kan direk aan Brig Jantjies by jantjiesg@saps.gov.za gekommunikeer word.
Whatsapp is 'n kitsboodskaptoepassing of app vir slimfone wat mense in staat stel deur die Internet te kommunikeer.
Whatsapp kan ook foto's, video en klank boodskappe te stuur, soos 'n SMS, en kan net met slimfone werk.
Whatsapp kan ook ligging deel deur die geïntegreerde kartering funksie. Anders as SMS'e, maak Whatsapp van data gebruik.
Inwoners wat nog nie oor Whatsapp op hul slimfone beskik nie, kan dit aflaai by http://www.whatsapp.com/download/
'Ons bring jou die nuutste Mosselbaai, Tuinroete nuus'
