MOSSELBAAI NUUS - 'n Man van Mosselbaai is is vandag, 5 Augustus, in die plaaslike Streekhof tot effektief 15 jaar gevangenisstraf gevonnis op aanklagte van huisbraak.
Die 42-jarige man, Metota Meshack Sithole, is in die Mosselbaai Streekhof deur Landdros Neels Nortje skuldig bevind op 5 uit die 6 aanklagte teen hom.
Vier van die aanklagte is huisbraak met die opset om te steel en diefstal, asook een aanklag van huisbraak met die opset om te steel.
Die skuldigbevinding volg nadat verskeie besighede aan die Tuinroete in 2014 onder rooftogte deurgeloop het. Die modus operandi in die rooftogte was dieselfde.
Sithole het onder meer die voormalige Spar in Groot-Brakrivier (nou ‘n Pick ‘n Pay) beroof. Destyds het die Advertiser berig, toegang tot die winkel is deur die dak verkry waarna ‘n groot bedrag geld uit die besigheid se kluis beroof is (Rooftog by Groot Brak Spar, 7 Maart, 2014).
Die kluis is met ‘n hoekslyper nouekeurig deurgesny. Landdros Nortje het aan Sithole gesê dat hy onder meer deur middel van DNS wat op ‘n koeldrankbottel in een van die winkels gevind is, met die misdaad verbind word.
Sithole is ook met die misdrywe verbind deur middel van bewyse vanaf selfoontorings, wat aangedui het dat Sithole ten tye van die misdrywe oor sy werksfoon naby die geteikende winkels gepraat het.
Johan Erasmus, vir die Staat, het in die saak aangekla.
Lees meer in volgende week se Mossel Bay Advertiser, asook aanlyn.
'Ons bring jou die nuutste Mosselbaai, Tuinroete nuus'
