'Ma-verkragter': Kruisondervraging bring onthullings

GROOT-BRAKRIVIER NUUS - Die verhoor van 'n man van Groot-Brakrivier wat van die verkragting van 'n negejarige meisie asook die verkragting van sy eie bejaarde ma aangekla word, het op Vrydag, 14 Oktober in die Mosselbaai-streekhof voortgegaan. Die meisie se ma is deur die staat kruisondervra.

Die 42-jarige man van Tergniet het na bewering sy 79-jarige ma etlike kere tussen 2012 en 2014 verkrag. Hy word ook daarvan aangekla dat hy die 9-jarige meisie gedurende die tydperk verkrag het. Die man se ma is intussen aan natuurlike oorsake oorlede.

Die negejarige slagoffer se ma, wat in 'n verhouding met die verdagte se broer is, het tydens kruisondervraging gesê dat sy drie van haar dogter se onderbroekies in die man se besit gevind het. Sy het aan die hof gesê dat sy hom gekonfronteer het en aan hom gevra het wat hy met die onderklere doen. Die getuie het aan die hof gesê, dat die verdagte na bewering aan haar geantwoord het, hy "snuif" dit.

Die vrou het ook getuig dat sy en haar kêrel, die verdagte en sy ma 'n aand alleen by die huis gelos het, waarna sy met hul terugkoms die bejaarde vrou kaal en verward op 'n bed aangetref het. Volgens die getuie was daar bloed op die laken.

Die vrou het aan die hof gesê dat die bejaarde vrou 'n besering aan haar been gehad het nadat sy 'n operasie moes ondergaan, maar dat die besering goed verbind was en nie die oorsaak van bloed op die laken kon wees nie.

Die staat het streeklanddros F Makamandela gevra om die saak uit te stel sodat daar met die volgende getuie, die broer van die verdagte, gekonsulteer kan word. Die saak is uitgestel na 13 Desember. Die man bly in aanhouding.

Klik hier vir vorige artikels: