MOSSELBAAI NUUS - 'n Toename in misdaad het besigheids- en ontwikkelingseienaars asook die opsigsters van woonkomplekse in die Diasstrand-gebied genoop om verlede week byeen te kom om die situasie te bespreek.
Die groep van ongeveer 20 het op Vrydag, 13 Mei, by die Diaz Strand Hotel byeengekom.
Volgens kapt Wollie Fourie, kommunikasiebeampte van die Da Gamaskop-polisie, het huisbraak veral gedurende die afgelope drie maande in die Diasstrand-omgewing toegeneem.
Die tendens het aanvanklik begin met 'n toename in inbrake by besighede in die industriële gebied van Voorbaai, waarvandaan dit uitgebrei het na Boland Park en Bayview, aldus kapt Fourie.
"Daar is ook ingebreek by verskeie wonings en waardevolle items is gesteel. Sommige van hierdie wonings is in sekuriteitskomplekse waar veral heinings beskadig is om toegang tot die persele te verkry."
Volgens kapt Fourie het die SAPD verskeie aksies van stapel gestuur en taakspanne ontplooi wat die probleemgebiede patrolleer. Tydens hierdie optredes is verskeie suksesse behaal en daar is op gesteelde goedere beslag gelê. "Dit het egter nog nie die gewenste effek gehad om misdaad hok te slaan nie."
Kaptein Fourie meen dat van die probleme wat geïdentifiseer is, is dat besigheidspersele nie behoorlik beveilig word deur onder meer alarmstelsels, diefwering of selfs waghonde wat alarm kan maak in die geval van misdaad nie.
"Met die huidige ekonomiese toestand, werkloosheid en toevloei van mense na die gebied, is daar meer voetgangers in hierdie gebiede bedags en snags wat opportunistiese misdade pleeg. 'n Effektiewe buurt- en besigheidswag is die enigste permanente oplossing om in samewerking met die SAPD en sekuriteitsmaatskappye die gebied behoorlik te beveilig."
Kaptein Fourie sê dat in die lig van eskalerende misdaad, dit noodsaaklik is vir besigheidsvennote en bure om mekaar te ondersteun en proaktief op te tree om hulle eiendom te beveilig.
"Die SAPD ondersteun graag enige inisiatiewe wat positief bydra tot die bekamping van misdaad."
Belanghebbendes beraam planne
Verlede Vrydag, het verteenwoordigers van 11 woonkomplekse, asook personeel van verskeie sekuriteitsmaatskappye en die SAPD byeengekom om die misdaadkwessie te bespreek. Tydens die byeenkoms is die Diaz-beskermingsvereniging op die been gebring.
'n Sameroeper van die byeenkoms, Theodore Hibbert van Stay@ Diaz sê die Diasstrand-gebied word voortdurend geteister deur inbrake en rooftogte op die strandgebied.
"Ek het onlangs begin met verskeie inisiatiewe om die sekuriteit op te skerp by Stay@Diaz. Toe Nerita Koutandos van Pansy Cove my skakel met haar versoek vir 'n vergadering om die misdaadprobleem in ons midde aan te spreek, het ek dadelik ingestem. Nerita is ook al raadop met die toenemende aantal inbrake."
Ao Hein Meyer, sektorbevelvoerder die die Da Gamaskop-polisie se sektor 2 waarin die Diasstrand-gebied val, het tydens die vergadering gesê dat alle misdaad gerapporteer moet word aangsien dit 'n beduidende effek op misdaadstatistiek het en tot verskerpte misdaadbekamping in die gebied kan bydra.
Volgens Hibbert vorm Diasstrand 'n voortdurende deurloop vir kriminele wat met hul buit vanaf Voorbaai- en Bayview-roetes soek waar hul die minste kans het om betrap en gevang te word.
"Die misdaadprobleem is tweeledig in die area in terme van die perseel- asook publieke beveiliging en ons wil dit dienooreenkomstig behandel in die toekoms. Sommige mense beskryf die aanvalle as petty theft, maar daar is absoluut niks gering omtrent 'n roof of die aanval van 'n persoon nie," meen Hibbert.
Die eerste vergadering is baie goed ondersteun en 'n daadwerklik gestruktueerde aksie is geloods om Diasstrand weer veilig te maak vir inwoners en vakansiegangers, aldus Hibbert.
"Ons wil 'n sterk boodskap uitstuur: 'n warm welkom vir besoekers en zero verdraagsaamheid teen oortreders. Alle ander belanghebbendes in die Diasstrandgebied is welkom om ons te kontak by diazcomsec@gmail.com. Hulle kan ook vir Nerita kontak by 0726240717. Daar sal gepoog word om met almal in die gebied kontak te maak om ondersteuning te win."
Die groep bedryf reeds 'n effektiewe WhatsApp-groep, asook 'n facebookblad.
* Sektor 1: 082 379 3451 (voertuig) of 084 327 6127 (sektorbevelvoerder - sers Jansen)
* Sektor 2: 079 894 1647 (voertuig) of 082 522 1709 (sektorbevelvoerder - ao Meyer)
* Sektor 3: 082 379 2449 (voertuig) of 079 879 9093 (sektorbevelvoerder - ao Botha)
ARTIKEL: CORNELLE CARSTENS, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
