MOSSEL BAAI NUUS - "Mosselbaai se buurtwagte is waarskynlik die besgeorganiseerde groepe in die provinsie en kan heelwat dorpe 'n ding of twee leer." Dit is die mening van die direkteur van veiligheid van die Wes-Kaapse regering, David Coetzee. Hy was boonop baie beïndruk met die goeie opkoms by die vergadering vir lede van verskeie buurtwagte.
Danabaai se buurtwag, onder leiding van Otto Ploog, het formele akkreditasie van die Wes-Kaapse regering ontvang en het voorts dus die konstitusionele reg om gemeenskapspatrollies te doen en om as geregistreerde organisasie onafhanklik binne die gestelde riglyne te funksioneer. Boonop het die buurtwaglede van Heiderand, Bo-dorp en Onderdorp ook Dinsdagaand die buurtwaglede van Danabaai ondersteun en ook met personeel van die Wes-Kaapse regering vergader om onder meer wenke en raad uit te ruil.
Die vergadering, wat deur raadslid Marie de Klerk gelei is, is besonder goed bygewoon. Raadslid De Klerk het buurtwaglede bedank vir die onmisbare rol wat hulle in die voorkoming van misdaad in die gemeenskap speel en inwoners aangemoedig om in groter getalle by buurtwagte betrokke te raak.
"Ruil gerus vanaand kundigheid onderling uit, bou nuwe kontakte; saam bou ons 'n onstuitbare span wat misdaad in ons gemeenskappe beveg," het raadslid De Klerk gesê. Sy het bygevoeg dat sy voornemens is om 'n sterk buurtwag ook in Aslapark te vestig.
Coetzee sê die sleutel tot sukses teen die toenemende misdaad is om netwerke te bou en om onderlinge bande as 'n eenheid te versterk.
"Goeie verhoudinge is die sleutel tot
misdaadvoorkoming. Bure wat mekaar ken,
kan vir mekaar intree. Die gemeenskaps-veiligheidswet bied buurtwagte 'n behoorlike raamwerk vir wettige funksionering en die voorkoming van misdaad. Geakkrediteerde buurtwagte kan regtens opleiding van die departement en ondersteuning van hul plaaslike polisie verwag en ontvang en kan regtens geld insamel om hul misdaadvoorkomingspogings te ondersteun."
Danabaai se buurtwag is by die byeenkoms formeel geakkrediteer. Aysha Fortuin van die Wes-Kaapse regering het benadruk dat die akkreditasie vir twee jaar van krag is en het 'n groot houer met van die vernaamste benodigdhede soos onder meer magneetkentekens vir patrollievoertuie, glimbaadjies en flitse ontvang. Noodhulphouers uitgedeel.
Tydens die informele kuiertjie na die vergadering is lede van die ander buurtwagte se wenke, goeie raad en dure lesse met die Danabaai-buurtwaglede gedeel.
Danabaai-buurtwag se voorsitter, Otto Ploog en wyksraadslid Marie de Klerk ontvang die akkreditasiesertifikaat van Aysha Fortuin en David Coetzee, verteenwoordigers van die Wes-Kaapse regering wat namens die Wes-Kaapse LUR vir gemeenskapsveiligheid, minister Dan Plato, opgetree het.
Lede van die Danabaai-buurtwag toon die geskenkpak en van die inhoud, wat onder meer noodhulpvoorraad, glimbaadjies, behoorlike flitse en ander noodsaaklikhede ingesluit het.
ARTIKEL & FOTO'S: NICKEY LE ROUX, MOSSEL BAY ADVERTISER JOERNALIS
'Ons bring jou die jongste Mosselbaai, Hessequa, Klein Karoo nuus'
