Hoewel die meeste hengel-plekke die jaloerse geheim van die plaaslike inwoners is, is daar heelwat plekke wat reeds bekendheid verwerf het vir die goeie vangste wat daar gemaak word.
Die skuimgate van die Poort tot by die hawegebied is veral vir strandhengel gewild. Hier word groot mosselkrakers vanaf November, tydens en na ‘n Suid-oostewind gevang wanneer ‘n karp of siffie nader aan die kant kom kossies soek. Staan vas met ‘n sterk gerei want hierdie kragtige visse word net met ‘n goeie stukkie gespook geland.
By Munro’s Baai en Santos-strand was hengelaars al verras met gespikkelde knorders (grunters) wat in die stil water op ‘n ligte lyntjie en flentertjie aas uitgetrek is.
Die gebied vanaf Diazstrand tot by Hartenbos is veral gedurende Desember bekend vir elk en kabeljou.
Diegene wat weet hoe kan met ‘n lewendige springertjie die katrol laat sing wanneer ‘n leervis wat die pad see-in vat. Vir hierdie vegtervis is ‘n lepel ook nie te versmaai nie.
Probeer gerus die gebied by Beneke-se-klip en verder strand-af na die aflooppyp tussen Hartenbos en Diazstrand regoor die eiland.
Die kranse agterom Die Punt is hengelaars met sterk bene wat kranse kan klim se droom. Dit is egter ‘n baie gevaarlike gebied wat slegs deur diegene wat die gebied goed ken, besoek behoort te word. Moenie onnodig kanse waag nie.
'Ons bring jou die nuutste Mosselbaai, Tuinroete nuus'
