MOSSELBAAI NUUS - Die KwaNonqaba-polisie se kommunikasiebeampte, sersant Kapp, het bevestig dat 'n 38-jarige man van Aslapark môre in die Mosselbaai Landdroshof sal verskyn op 'n klag van brandstigting.
Die man is deur munisipale verkeersbeamptes gearresteer nadat buurtwaglede om 15:40 op 31 Desember alarm gemaak het en is tans in aanhouding by die Da Gamaskop-polisiestasie.
Die ondersoekbeampte is sersant Lindie van Loggerenberg en enige persoon met inligting word versoek om haar te kontak by 044 606 5600.
Intussen het ligte reën oor Danabaai begin uitsak en sal die laaste paar plekke waar die vuur nog tot vanmiddag gesmeul het, waarskynlik oornag finaal geblus word.
Mosselbaai se Brand en Reddingsdiens het reeds sedert voor Kersfees tientalle brande in Mosselbaai en omgewing geblus. By twee geleenthede, op Danabaai en in die geval van wegholbrande in die Brandwag-omgewing, is lugsteun ingeroep en is daar telkens vir etlike dae deur al die rolspelers deurnag gewerk om die brande onder beheer te bring en te blus. Die oorsake van die brande word tans ondersoek.
Verskeie roetes, onder meer die N2, die R328 oor die Robinsonpas en die enigste toegangsroete na Danabaai, Floraweg, is by herhaling weens die vlamme en of digte mis tydens die brande vir verkeer gesluit.
Intussen het Mosselbaaiers in groot getalle hul tot sosiale media gewend om die nooddienste, en veral die vlieëniers van die onderskeie helikopters, Mosselbaai Nood en Reddingsdiens se brandbestryders, munisipale en provinsiale verkeersbeamptes, en gemeenskapsorganisasies soos die landbou-verenigings en buurtwagte vir hul onbaatsugtige en toegewyde dienslewering te bedank. Veral die nuwe munisipale bestuurder, Advokaat Thys Giliomee en sommige raadslede, wat telkens deurnag self ingespring en brandgeslaan of met verkeersbeheer gehelp het, se optrede het by die gemeenskap en munisipale personeel groot bewondering ontlok.
Lees vorige artikels:
- Dana Bay fire: Suspected arsonist arrested
- Dringende versoek aan Danabaai-inwoners
- Brand in Danabaai grootliks onder beheer
- Opvolg: Danabaai-brand
- Paaie gesluit om Danabaai-brande te blus
- Update: Mossel Bay fires
- Please exercise caution in adverse weather
ARTIKEL: NICKEY LE ROUX, MOSSEL BAY ADVERTISER-NUUSREAKTEUR
'Ons bring jou die nuutste Mosselbaai, Tuinroete nuus'
