MOSSELBAAI NUUS - Phil Jansen het sy visier daarop ingestel om 'n afstand van 1 500 km per e-fiets af te lê ter ondersteuning van prostaatkankerbewustheid.
Jansen se drie maande lange 'Reis van Hoop' het op Maandag 1 Junie in Mosselbaai begin.
Hy beplan om langs die Weskus te ry en sowat 51 dorpe te besoek, met die doel om bewustheid oor mansgesondheid en vroeë opsporing van prostaatkanker te bevorder.
Dié radio-omroeper en prostaatkanker-oorlewende gebruik 'n e-fiets met traponder-steuning om die lang afstande aan te pak, veral met 'n fiets-waentjie agteraan.
"Dit help my om energie te bespaar sodat ek mense kan ontmoet, onderhoude kan doen en bewusmakingsgesprekke kan voer," het hy gesê.
Jansen, wat in 2016 met prostaatkanker gediagnoseer is, sê sy persoonlike ervaring het hom gemotiveer om ander mans aan te moedig om hul gesondheid ernstig op te neem.
"Baie mans stel dit uit om getoets te word. Ek wil wys daar is lewe ná prostaatkanker en dat vroeë opsporing lewens kan red," het hy gesê.
Tydens sy reis sal hy verskeie gemeenskappe besoek, moti-veringspraatjies lewer en sy ervaring as kankeroorlewende deel. Hy sal ook sy reis op sy radioprogram en sosiale media dokumenteer.
Jansen het vooraf intensief geoefen en sy toerusting getoets om vir die uitdagings van koue winterweer, sterk winde en lang afstande voor te berei.
Die publiek kan sy reis volg of sy BackaBuddy-veldtog, "Radio X5 on the Road - A Journey of Hope", ondersteun.
Navrae: Phil Jansen by 072 079 3645.
‘Ons bring jou die nuutste Tuinroete, Hessequa, Karoo nuus’
