Paasfees oorskadu deur tragedie ná hengelaar by Heroldsbaai afgespoel

Update

GEORGE NUUS - Vir Kobus Honiball se gesin is hierdie Paasnaweek een van die donkerste tye van hul lewens. Dit is ’n tyd wat gewoonlik met hoop en nuwe begin geassosieer word, maar nou oorskadu is deur die verlies van hul pa, eggenoot, oupa, broer, neef en vriend.

Vriende het hom as hul “kaalvoet Namibiër” beskryf.

Honiball (73), ’n bekende en hoogs ervare plaaslike hengelaar, het verdrink nadat hy Woensdag, 1 April, van rotse naby Heroldsbaai afgespoel is.

’n Liggaam, vermoedelik dié van Honiball, is Saterdag, 4 April, by Swartvlei-strand langs die Sedgefield-kuslyn aangetref.

Hoewel formele identifikasie nog hangende is, sê sy dogter, Lana Potgieter, sy is “99,9% seker” dat dit haar pa is, gebaseer op foto’s wat sy aan die polisie verskaf het en die beskrywing van die klere wat hy ten tyde van die voorval gedra het. Geen ander verdrinkings is in die gebied aangemeld nie.

Volgens Potgieter was haar pa ’n passievolle en bekwame hengelaar wat in die verlede Namibiese kleure in rots- en strandhengel verwerf het.

Die Nasionale Seereddingsinstituut (NSRI) is Woensdagaand omstreeks 20:50 geaktiveer nadat Dieter Maritz, die vriend wat saam met Honiball op die rotse was, hulp ontbied het.

Reddingsswemmers en twee reddingsbote uit George en Mosselbaai is ontplooi, terwyl die polisie, Wes-Kaapse EMS en George-brandweer- en reddingsdienste ook na die toneel ontbied is.

’n Uitgebreide soektog, wat ook hommeltuie van EMS en lede van die George-gemeenskapspolisiëringsforum ingesluit het, het aanvanklik geen resultate opgelewer nie.

Polisie-duikers is later ingespan en van die vermiste man se hengeltoerusting is gevind. Die soektog het in die dae daarna voortgeduur.

Die Suid-Kaapse polisiewoordvoerder, AO Chris Spies, het bevestig dat ’n visserman omstreeks 00:30 Saterdagoggend ’n liggaam by Swartvlei ontdek en owerhede ontbied het. Nooddienste het gereageer en die liggaam is deur polisie-duikers gebring.

Potgieter het verduidelik dat haar pa saam met Maritz aas gaan soek het toe die voorval plaasgevind het. Hulle het beplan om die volgende dag te gaan hengel.

“Hy was ’n baie fikse man,” het sy gesê. “Hulle het maklik tot 10 km per dag gestap wanneer hulle gehengel het, steil kranse uitgeklim en swaar vangste gedra.”

Die gesin wag steeds op bevestiging van die presiese oorsaak van dood, wat met ’n nadoodse ondersoek bepaal sal word. Potgieter meen hy kon moontlik sy kop teen ’n rots gestamp het voordat hy in die water beland het, aangesien hy binne minute nie meer deur Maritz gesien is nie.

“Dit het binne minute gebeur,” het sy gesê. “Dieter [Martiz] het gesien hoe hy in die water ingespoel word. Hy het omgedraai om sy foon te gryp om die NSRI te bel, en binne oomblikke was my pa weg.”