MOSSELBAAI NUUS - Ná 38 en 'n half jaar as die hartklop van die administrasie by Hoërskool Punt - as die skoolhoof se sekretaresse - het Martha Leonard (65) op Donderdag 26 Maart finaal afskeid geneem van 'n skool wat sy as haar tweede huis beskryf.
Leonard, wat in Mosselbaai gebore is, se verbintenis met die skool strek veel verder as haar loopbaan.
Sy was reeds in 1974 'n leerder daar toe dit nog by Milkwood Primêre Skool gesetel was, voordat dit in 1976 na die nuwe gebou verhuis het.
Later sou haar eie twee seuns ook daar skoolgaan en matriek aflê, die een in 1997 en die ander in 2010.
"Hoërskool Punt is 'n plek waarvoor ons baie lief is. Dit was 'n groot deel van ons lewe = myne en my kinders s'n," vertel sy.
Gedurende haar loopbaan het Leonard onder verskeie skoolhoofde gewerk - eerste dr. Eugene Mostert, gevolg deur Johan van der Merwe (waarnemend), Kobus Bester, Ferdi Pieterse (waarnemend) en uiteindelik Adolf Gouws.
As hoof se sekretaresse het sy 'n sleutelrol vervul, dikwels die stil skakel tussen die skoolbestuur, personeel, leerders en ouers.
Haar dagtaak het alles behels van die bestuur van die hoof se dagboek en reël van afsprake tot die hantering van sensitiewe situasies en die skep van 'n rustige omgewing vir leerders buite die kantoor.
"Jy is die skakel tussen die hoof, die kinders, die publiek en die ouers. Jy moet vertroulikheid handhaaf en help om die vrede te bewaar, veral in tipiese skoolsituasies," sê sy.
Ten spyte van die uitdagings, veral in die dae toe eksamenvraestelle nog intern gedruk is en die druk hoog was, onthou Leonard haar werk met groot waardering.
"Ek het my werk baie geniet. Ek het altyd gesê ek het seker die beste werk. Ek het elke dag met 'n glimlag gaan werk, want as jy goed met jou base oor die weg kom, kan jy enige situasie hanteer."
Die afgelope nege maande het sy steeds betrokke gebly deur uit te help en haar opvolger oor drie maande op te lei. Sy glo dit is nou tyd vir die nuwe span om eienaarskap te neem. "Ek het vir hulle gesê hulle moet nou hulle plekke inneem, goed wees vir die skool en die hoof versorg."
Haar afskeidseremonie op Donderdag beskryf sy as emosioneel, selfs al het sy probeer om sterk te bly.
"My hart was verskriklik seer. Ek wou nie die seremonie bederf deur in trane te wees nie, maar toe ek by die huis kom, het ek 'n goeie huil gehad," sê sy.
Een van die mees spesiale oomblikke vir haar was toe die onderwysers een vir een vir haar 'n roos gegee het. "Dit was ongelooflik spesiaal. Baie van die onderwysers wat nou daar is, was eens self leerders by die skool."
As verrassing is sy ook met 'n erewag vereer, en het sy die dag afgesluit met haar kenmerkende aankondiging: "Your attention for the following announcement!" - iets waaroor haar kollegas haar jare lank speels geterg het.
Hoewel sy erken dat sy die skool en sy mense baie gaan mis, sien Leonard uit na die nuwe fase in haar lewe.
Vir eers beplan sy om haarself tyd te gee om aan te pas, met moontlike aanlyn werk vir 'n paar ure per dag om besig te bly. "Ek gaan kyk hoe ek by hierdie nuwe fase inpas."
‘Ons bring jou die nuutste Tuinroete, Hessequa, Karoo nuus’
