RUGBY NUUS - Heidelberg het Saterdag 17 September, in teenstelling met hul laaste paar wedstryde waartydens hulle nie regtig beïndruk het nie, 'n tuishalf-eindstryd verseker met 'n uithalervertoning in hul laaste ligawedstryd weg teen Bridgton.
Heibi het hul laaste Superliga A-wedstryd van die seisoen met 49 - 0 gewen nadat hulle rustyd met 35 - 0 gedraai het.
Heibi het hul opponente totaal oorheers en sewe keer gaan druk en hul lojale en fanatiese ondersteuners in ekstase gehad.
Heibi se punte is deur Trevino Gordon (regtervleuel) met twee drieë, Lorenzo Gordon (linkervleuel), Francois Pieters (senter, Berthal September (skrumskakel) en die slotpaar, Simon du Toit en Fernell Pretorius, elk een drie. Corbin Swartbooi (heelagter) het met sewe doelskoppe geslaag.
Die dag het eintlik nie so goed vir die tweede en derde spanne verloop nie en beide het verloor.
Heibi se C-span het die onderspit gedelf met 13 - 3 nadat hulle rustyd met die telling op 0 - 0 gedraai het. Veandré Carelse (losskakel) het Heibi se punte met 'n strafskop aangeteken.
Bridgton se tweedes het naelskraap met 25 - 22 gewen nadat hulle rustyd met 10 - 3 agtergeloop het.
Heibi se drieë is deur Denovan Riddles (loskakel), Shirgené Swartbooi (linkervleuel) en Duvin Jacobs (haker) gedruk met Carlo Williams (regtervleuel) wat met twee doelskoppe en een strafskop geslaag het.
Heibi het tweede op die punteleer geëindig en speel tuis teen Progress van George.
'Ons bring jou die nuutste Tuinroete, Hessequa, Karoo nuus'
