MOSSELBAAI NUUS - Daar word elke jaar 'n nasionale kampioenskap vir gestremde rolbal aangebied en dit sluit in liggaamlik en gesiggestremde rolbalspelers.
Hierdie jaar was dit in Durban aangebied van 22-28 Mei. Met die reën in Natal het twee dae van spel uitgereën. Spel kon eers Dinsdag hervat word.
Blinde rolbal word in vier kategorieë ingedeel: B1: totaal blind, B2: sien bietjie, B3: sien bietjie meer tot en met die voet van 'n helper of director, B4: sien meer.
Elke blinde rolbalspeler se gesigsveld moet eers voor elke kampioenskap geëvalueer en geklassifiseer word en elke blinde rolbalspeler moet 'n helper hê.
Hulle vorm 'n span, dus in kompetisies kry die speler en helper dieselfde toekennings.
Daar word op so 'n kampioenskap enkels en pare gespeel.
Eben Fourie, geklassifiseer as 'n B4-speler en sy helper, Hannetjie Fourie van Hartenbos-rolbalklub, het in die toernooi in Durban met goud weggestap in enkelspel en met goud in die gemengde pare. Daar was dit Eben en Hannetjie saam met Avril Davids, gehelp deur Quinton Capes van Kaapstad .
Eben en Hannetjie het Suid-Afrika al drie keer tevore in wêreldkampioenskap verteenwoordig, in enkel- en parespel, en spog met drie goue, een silwer en een brons medalje.
Hulle was ook deel van 'n uitnodigingspan na Israel in 2014, waar Eben-hulle 'n goue medalje in enkelspel geneem het .
Hannetjie het hierdie toernooi net ingestaan vir Charles Collen, wat eintlik Eben se gereelde helper is.
'Ons bring jou die nuutste Mosselbaai, Tuinroete nuus'
