MOSSELBAAI NUUS - Die besige langnaweek het gesorg dat vele voete oor ons mooi gholfbaan beweeg en die gunstige kommentaar wat van ons besoekers ontvang is, dui daarop dat Mosselbaai-gholfklub deel van elke gholfliefhebber se gholfreis geword het.
Die afgelope week het die spelers in nie minder as vier kompetisies kragte gemeet.
Die Sakemannedag op Woensdag, 26 April het soos gewoonlik weer 'n magdom spelers baan toe gelok. Die beterbalkompetisie was fel en uitstekende tellings is aangeteken. Die 82-jarige Colin Buck het bewys dat hy nog oor vele vaardighede beskik en het saam met sy veel jonger maat, Chris Barnard, op 49 punte koning gekraai.
Slegs een punt agter op 48 punte het Roelof Combrinck en Gerhard Pool ook hulle staal gewys. Op 47 punte het die volgende spelers ook prystafel toe gestap: W Pretorius en P Greyling, A van Wyk en W Stander, asook D en J van Langelaar. Selfs op 45 punte is die volgende spelers ook nie met leë hande huis toe nie: F van Zyl en E Malherbe, L du Toit en J Labuschagne, asook A Meyer en R Gerber.
Op Vryheidsdag, Donderdag 27 April, het die spelers mekaar die stryd aangesê in die individuele stableford-kompetisie. Die afdeling-wenners was as volg: A-afdeling: Kelvin Muller (39 punte), B-afdeling: Gloria Greyvenstein (42 punte), C-afdeling: Laetitia Higgs (33 punte). Die volgende spelers het ook in die heerlike vleispryse gedeel: C Barnard (40 punte), M Nel, R Hendry en L Wessels, almal op 39 punte.
Saterdag, 29 April se individuele stableford-kompetisie is deur 164 spelers ondersteun. Roelof Combrinck het op 41 punte in die A-afdeling geseëvier. Dit was egter in die B-afdeling waar Clinton Windvogel (voorgee 19) verwoesting gesaai het deur 'n massiewe 47 punte op te stapel. Sy netto-telling was 'n briljante 61 houe. Gert Pieterse het in die C-afdeling nie veel moeite ondervind om op 37 punte die botoon te voer nie. Uitstekende tellings is ook deur die volgende spelers aangeteken: C Kaptein en N Domingo (41 punte), B Vermeulen (40 punte), asook C Pretorius, W Pretorius en F de Lange, almal op 38 punte.
Ons jaarlikse Sanlam Kankeruitdaagreeks het op Maandag, 1 Mei plaasgevind. Die volgende spelers het deurgedring na die streeksfinaal wat op 30 Julie op Plettenbergbaai plaasvind.
A-afdeling vroue: Gail Botha
B-afdeling mans: Chris Barnard
B-afdeling vroue: Lize-Mari Prinsloo
C-afdeling mans: Arthur Percival
C-afdeling vroue: Tracy Venter
Baie geluk aan die spelers en ons glo julle sal ons naam hoog hou.
'Ons bring jou die nuutste Mosselbaai, Tuinroete nuus'
