MOSSELBAAI NUUS - Die afgelope naweek was vir ons sportgeesdriftiges smullekker, want ons Protea-krieketspan het Sri Lanka behoorlik karnuffel, die Blitzbokke het in Nieu-Seeland geseëvier en Louis Oosthuizen het ook die Mosselbaaiers se harte laat warm klop met sy derde plek in die Phoenix Ope in Amerika.
Op die tuisfront het die entoesiasme en geesdrif ook nie ontbreek nie, want op Woensdag, 1 Februarie het 184 spelers aangetree vir Bounty Wildsverwerking se maandelikse borgdag.
Waldo Vorster se bestendigheid was een te veel vir sy teenstanders in die A-afdeling. Sy 41 punte in die individuele stableford-kompetisie was genoeg om hom koning te laat kraai. 'n Besoeker, Fred Rettlinger, het in die B-Afdeling sy medespelers groen van jaloesie gemaak deur 45 punte op te stapel en loshande bo te eindig.
Gert Pieterse het weer eens sy vegtersgees getoon deur met gebreekte ribbes en al op 38 punte die C-afdeling in te oes. Die volgende spelers het op 41 punte ook diep in die pryse gedelf: Ferdie Jonck, Dudley du Plessis, asook ons klubkaptein, Martiens Mulder.
Nog was dit nie die einde van die pryswenners nie, want D van Langelaar, H Klopper en W Kotzé se 40 punte was genoeg om die mense by die huis met 'n lekker braai te bederf.
Saterdag, 4 Februarie se individuele syfer plus-kompetisie is deur die plaaslike spelers oorheers. Kosie Otto was op sy allerbeste en vanaf 'n voorgee van 13 teken hy 'n verstommende +8 aan en wen die A-afdeling op 'n drafstap. Een van ons belowende juniors, Wouter Dercksen, het in die B-afdeling geskitter met +7, terwyl Lood Loubser op +6 sy staal in die C-afdeling getoon het.
Uitsonderlike goeie tellings is aangeteken, want op +4 het die uittel-stelsel 'n paar spelers van pryse beroof. S Cronjé, G Pool en J Griesel, almal op +5, asook R Combrinck, A Derksen en M Malan op +4 het ook die prystafel besoek.
Wenners van die Bounty Wildsverkingborgdag is van links, agter: D van Langelaar, A Pretorius en F Jonck. Voor: W Vorster, G Pieterse en D van Heerden (bestuurder).
'Ons bring jou die nuutste Mosselbaai, Tuinroete nuus'
