MOSSELBAAI NUUS - Die wonderlike reën wat die afgelope week soos manna uit die hemel op ons dorstige aarde neergedaal het, het miskien 'n klompie gholfspelers se batterye nat gemaak, maar die helende effek op Moeder Aarde se plantegroei sal binnekort in sy volle glorie aanskou kan word.
Die maandelikse Sakemannedag het soos gebruiklik op die laaste Woensdag van die maand plaasgevind. Die groot aantal spelers het in twee afdelings meegeding.
In die A-afdeling (voorgee 0-24) is Hendrik Kriek en Seger du Plessis deesdae onstuitbaar. Hulle wen die beterbal stablefordkompetisie (gesamentlike voorgee 8) op 46 punte. Johan Labuschagne en Louw du Toit (gesamentlike voorgee 45) het doodseker gemaak van die B-afdeling deur 'n onaanvegbare telling van 49 punte daar te stel.
Die volgende spelers het ook in die heerlike braaipakke gedeel wat as pryse deur die sakemanne geborg is: Pieter Venter en Koos Snyman (46 punte) en Roelof Combrinck / Pierre Botes, Noël Domingo / Wiekus Pretorius, Johan Buys / Michael Parker, asook Dicky Swanich / Wynand Stander, almal op 45 punte.
Saterdag, 3 September, het die triestige, reënerige weer 'n paar bittereinders nie afgesit nie. Die A-afdeling van die beterbal houespelkompetisie is deur Gavin Reynolds en Noël Domingo op 62 houe gewen. In die B-afdeling het twee veterane, Hennie Klopper en Elias Engels hulle min aan die weer gesteur en op 62 houe die B-afdeling gewen.
Junior Kampioenskappe
Op Maandag en Dinsdag (12 en 13 September) vind die Louis Oosthuizen junior kampioenskappe plaas.
Top juniors van dwarsoor die land sal in aksie wees en gholf uit die boonste rakke word in die vooruitsig gestel.
Lente het aangebreek en bloeisels aan die bome is die eerste teken van die wonder van die natuur wat met die wisseling van seisoene gepaard gaan.
Stof die gholfstokke af en kom deel in die vreugde van samesyn met ou vriende wat straks deur die wintertyd 'n bietjie agterweë gebly het.
Hierdie manne het almal gedeel in die pryse tydens die Sakemannedagkompetisie. Agter: J Labuschagne, P Venter, S du Plessis, H Kriek en M Parker. Voor: R Combrinck, W Stander en D Swanich.
'Ons bring jou die nuutste Mosselbaai, Tuinroete nuus'
