SUID-KAAP NUUS - As die Slapende Skoonheid vroegoggend afkyk oor 'n ligte mislagie wat oor die Riversdal-vallei hang, dan weet jy dit gaan 'n heerlike dag vir gholf
wees - windstil, en vir hierdie tyd van die jaar nog heerlik warm.
So was dit dan ook verlede Dinsdag, 17 Mei, toe 44 Sages-lede en 'n paar besoekers die Riversdal-gholfklub besoek het.
'n Mens sien altyd daarna uit om op Riversdal te gaan gholfspeel. Die baan is pragtig groen en netjies versorg en die personeel laat jou altyd welkom voel.
Baie dankie aan Maka Swart, die baanopsigter, vir al jou moeite met die voorbereiding en ook aan ons voorsitter, Paul de Villiers, vir al jou organisasie om die dag vlot te laat verloop.
Baie dankie ook soos altyd aan Anton Swart van JC Slagtery wat vir ons wors en verskeie ander pryse geborg het.
Paul sê ook dat Max Baise se drankwinkel vir hom 'n baie spesiale prys vir die wynpryse gevra het. Wie van ons onthou nie vir Max van vroeër dae as hy so teatraal 'n drie op die rugbyveld kon toeken nie. Baie dankie, Max!
Die spelers het op Riversdal aan 'n Multiplier-kompetisie deelgeneem. Twee spelers speel saam en op elke putjie word hul stablefordpunte vermenigvuldig.
Nou weet ons almal 'n 3 en 'n 0 wat gemaal word gee vir jou 'n nul. Dis net sterk vriendskappe wat so 'n kompetisie oorleef!
Ek het na die tyd gehoor van twee voëltjies wat nulle op die telkaart gemaak het. Saam goed of saam sleg is hier die leuse!
1. Maka Swart en Bertu van Dyk (Riversdal) 69
2. Paul de Villiers en Muller Geldenhuys (Riversdal) 67
3. Terry Francis en Denoil Philander (besoekers) 66
4. Cassie Swanepoel en John van Rensburg (Boggomsbaai) 65
5. Dave en Melinda Gravett (Stilbaai) 64
6. Basie Nortjè en Charles du Randt (Riversdal) 63
7. Van le Roux en André Beukes (Boggomsbaai) 59
8. Chris Barnard en Buks Reynders (Mosselbaai) 56
Spogtwee's is behaal deur Cassie Swanepoel, Dave Gravett, Basie Nortjè en Muller Geldenhuys.
Die volgende Sages-saamtrek is op 21 Junie op Heidelberg en die formaat is 'n geelbal-beterbalkompetisie. Sien julle daar!
'Ons bring jou die nuutste Tuinroete, Klein Karoo, Hessequa nuus'
