MOSSELBAAI NUUS - Die maandelikse houespelkompetisie het op Woensdag 14 Januarie plaasgevind.
Houespel toets ‘n speler behoorlik, maar as die natuur ingryp en die wind kom op, dan is ervaring en vernuf broodnodig om sukses te behaal.
Johan van Rensburg (voorgee 5) is een van daardie spelers wat kan aanpas by omstandighede. Sy bruto-telling van 76 houe in uiters winderige toestande het aan hom ‘n welverdiende oorwinning in die A-afdeling besorg. Die naderende Klubkampioenskappe voorspel niks goed vir sy teenstanders nie.
Die bruto-wenner in die B-afdeling was John Blythe-Wood (voorgee 12) op ‘n verdienstelike 84 houe. Die bruto-wenner in die C-afdeling was Dicky Swanich wat deesdae sy stem gereeld dik maak. Sy 88 houe vanaf ‘n voorgee van 24 het gesorg dat hy verspot maklik sy afdeling wen. Die deur-winterde, gesoute Dawid Gerber (voorgee 10) se netto-telling van 67 houe, asook Toesie Dercksen (voorgee 19) ook 67 houe het aan hulle heerlike vleispryse besorg. Noël Domingo, Wessel Brand en Gavin Reynolds, almal 68 houe, het ook gedeel in die heerlike vleispryse.
‘n Kenmerk van deesdae se kompetisies is die hoë tellings wat aangeteken word. Die voorgee-stelsel kan deels daarvoor verantwoordelik wees. Saterdag
Saterdag 17 Januarie was geen uitsondering nie. Tiaan Tredoux het die A-afdeling van die individuele stableford kompetisie op 41 punte gewen. Vic Moll se 43 punte in die B-afdeling was net te goed vir sy entoesiastiese teenstanders. Peet Botha het ook na ‘n lang tyd weer prystafel toe gestap deur die C-afdeling op 42 punte te buit.
Die ander pryswenners was Dawn Wessels (42 punte), Ian Wessels (41 punte) en Attie van Niekerk en Noël Hudson op 40 punte.
Ons seniors (50+ jaar) en veterane (70+) moet ‘n aantekening maak dat die senior klubkampioenskappe op Saterdag 7 Februarie plaasvind. Die kampioenskappe strek oor 18 putjies en word gedurende die oggend-rondte afgehandel.
Vrydagaande bly nog steeds ‘n heerlike bymekaar-kom aand met gelukkige trekkings wat u naweek sommer reg kan laat begin. Vertrou dat ons sommer ‘n klomp van ons lede en besoekers hier sal sien!
'Ons bring jou die nuutste Mosselbaai, Tuinroete nuus'
