MOSSELBAAI NUUS - Mosselbaai-gholfklub se finale ronde van die 2015/2016 se kampioen van kampioene het op Woensdag, 20 Julie, plaasgevind.
Kompetisiewenners het kwartaalliks aan uitdunrondes deelgeneem en die wenners van die uitdun-rondes het in die finaal teen mekaar te staan gekom.
In die A-afdeling (voorgee 0-13) het Clive Kaptein (voorgee 5) sy beste vir laaste gehou en op 71 houe (netto 66) het hy seker gemaak om as kampioen gekroon te word. Die talentvolle dertienjarige Mujahib Jacobs, wat ook onlangs in Frankryk 'n junior toernooi gewen het, was die kampioen in die B-afdeling met 'n netto-telling van 76 houe. Joan Zietsman het die septer in die C-afdeling geswaai deur op 'n netto-telling van 73 houe as kampioen gekroon te word. Veels geluk aan drie waardige kampioene!
Global Golf het op Woensdag, 20 Julie, hulle maandelikse borgdag aangebied. In die A-afdeling van die individuele houespel het Clive Kaptein die bruto-afdeling op 'n skitterende 71 houe gewen. Gloria Greyvenstein se 84 houe en Ashwell Cameron se 91 houe was goed genoeg om as wenners in die B- en C-afdelings te seëvier.
Goeie netto-tellings is deur die volgende spelers aangeteken: E Engels (69 houe), asook E van den Berg, F de Lange, K Snyman en D van Heerden, almal op 71 houe.
Saterdag, 23 Julie, het slegs 'n handjie-vol spelers as gevolg van die winterweer aan die individuele stableford kompetisie deelgeneem. Klubkaptein Gavin Reynolds het die weersomstandighede goed hanteer en op 39 punte in die A-afdeling stof in sy teenstanders se oë geskop. Anton le Roux (37 punte) en Wayne Mitchell (33 punte) was onderskeidelik baas in die B- en C-afdelings.
'n Heerlike week vol vreugde en voorspoed word u toegewens met die hoop dat die Leeus Saterdag nog meer vreugde vir ons sal bring!
L Strydom (bestuurder) en C Kaptein (kampioen A-afdeling).
'Ons bring jou die nuutste Mosselbaai, Tuinroete nuus'
