SUID-KAAP NUUS - SWD-tweekamp kan terugkyk op 'n baie suksesvolle 42ste SA tweekampkampioenskappe.
Dit het op 7 en 8 April in die Paarl plaasgevind. Meer as 774 atlete uit 14 provinsies het deelgeneem en uitstaande prestasies is gelewer. SWD het 'n span van 71 atlete gestuur en het beslis hul plek vol gestaan tussen die beste SA atlete.
SWD verower vyf goue, twee silwer- en drie bronsmedaljes vir 'n totaal van tien. Vir die Presidentstoekenning vir die provinsie wat die meeste medaljes verower het, was dit net die WP wat die SWD in die medalje-wedloop kon klop.
"Dit is beslis 'n aanduiding van die kwaliteit tweekampatlete wat die SWD oplewer," sê Dave van der Walt, voorsitter van SWD-tweekamp en biathlon.
Daarbenewens verbeter Johan Windt (meesters mans) en Tammy Greenwood (dogters o.11) twee SA rekords. Die junior victor ludorum (Gustav Schlechter - seuns o.15) en senior victor ludorum (Johan Windt - meesters mans), gaan ook na die SWD.
SWD eindig vyfde in die junior afdeling, derde in die senior afdeling en behaal in die spankompetisie 'n vierde plek, naas WP (wenner), Boland en Vrystaat. "Die rede was dat een en elke atleet meer as hul beste gegee het," sê Van der Walt.
Minke Janse van Rensburg, SWD se atleet met besondere behoeftes, het ook haar goue medalje verower. SA kleure is ook toegeken aan Tammy Greenwoord, Gustaf Schlechter, Yvonne du Plessis en Johan Windt.
Dave van der Walt, voorsitter van SWD-tweekamp, is ook vereer met die toekenning van lewenslange ere-lidmaatskap as ere visevoorsitter van SA tweekamp, vir sy jare lange bydrae tot tweekamp in Suid-Afrika. Dit was Van der Walt se 26ste SA kampioenskappe wat hy bygewoon het.
Seuns o.11: Luca Potgieter (Silwer - 2 363 punte).
Dogters o.11: Tammy Greenwood (Goud - 2 375 punte en nuwe SA rekord).
Seuns o.15: Gustav Schlechter (Goud - 2 460 punte).
Dogters o.17: Lara Schlechter (Silwer - 2 343 punte).
Dogters o.19: Yvonne du Plessis (Goud - 2 372 punte).
Dogters o.19: Bianca le Grange (Brons - 2 270 punte).
Junior veterane mans: Juan Pretorius (Brons - 2 322 punte).
Dames veterane: Tanya Livingston (Brons - 2 283 punte).
Meester mans: Johan Windt (Goud - 2 455 punte en SA rekord).
Gestremde dogters: Minke Janse van Rensburg (Goud).
Puik prestasies is ook gelewer deur Jada Coetzee (dogters o.11 - 8ste), Llewlyn Viljoen (seuns o.15 - 9de), André Kleynhans (seuns o.17 - 7de), Anlize Vermeulen (dogters o.17 - 7de), Russel Pratt (seuns o.19 - 5de), Charl Fourie (mans junior veterane - 10de), Lorinda du Preez (dames junior veterane - 10de), Marius Schlechter (mans senior veterane - 5de) en Edie Lutsch.
Die SWD-span op hul plek tussen die ander spanne.
'Ons bring jou die nuutste Tuinroete, Klein Karoo, Hessequa nuus'
