MOSSELBAAI NUUS - Kenani is weer eens baie trots op die lede wat op Saterdag, 1 Oktober aan die Golden Games deelgeneem het. Hulle het as deel van die Eden/Karoo-span aan die WP provinsiale spele, wat in Stellenbosch gehou is, deelgeneem. Die 'ball pass and kick'-span, bestaande uit tien lede, het goud ontvang met 'n baie goeie tyd van 15,8 sekondes.

Nog 'n lid van die Kenani-span het goud verower met die jukskei in die kategorie bo 70-jarige ouderdom. In die 4x100m aflos-span, het 'n lid van Kenani brons ingepalm.

Die goue medalje wenners sal op 19 en 20 Oktober in Bloemfontein aan die inter-provinsiale spele deelneem. Die Kenani-bestuur en -lede wens al die deelnemers geluk met hulle prestasie en wil hulle ook aanmoedig om dieselfde hoogtes te bereik tydens die volgende byeenkoms.


Pieter van der Poel (78) het uitgeblink in jukskei. Hier is hy op die podium in sy lemmetjiegroen Kenani-spandrag.