EIENDOMSNUUS - Eiendom as 'n bateklas het vir Suid-Afrikaners oor die langtermyn soliede opbrengste gegee.
Dit word ook gesien as die bateklas wat wêreldwyd deur die meeste miljoenêrs as die boublok van hul beleggingsportefeuljes gebruik word.
Genoteerde eiendom het in 2014 'n allemintige opbrengs van 26,6% behaal. Vraag is, waar lê die geleenthede vir 2015 in die eiendomsmark en is die genoteerde eiendomsektor nie te duur nie?
Die dryfveer van eiendom oor die langtermyn was nog altyd die potensiële huurinkomste wat 'n eiendom kan bied. Sekerlik die belangrikste faktor wat in ag geneem moet word indien 'n belegging in eiendom gemaak word, is die termyn.
Eiendom is nie 'n likiede bateklas nie en veral direkte eiendom moet gekoop word met 'n tydsraamwerk van 10 tot 20 jaar.
Terug by ons vraag: Is die genoteerde eiendomsektor te duur?
Waarskynlik ja, maar dit maak steeds sin om in 'n gebalanseerde portefeulje genoegsame blootstelling aan die sektor te hê.
Waar is die geleenthede in 2015? Ongetwyfeld in die residensiële koop-om-te-verhuur mark.
1. Eskom se situasie bemoeilik enige nuwe ontwikkelinge;
2. Munisipaliteite oor die algemeen het nie die fondse om nuwe ontwikkelings te befonds nie en hierdie las word al hoe meer op die ontwikkelaar afgewentel;
3. Die verskil tussen boukoste en 'n bestaande eiendom is tans ± 30%. Dit is dus 30% goedkoper om 'n bestaande woonstel te koop as om een te bou;
4. Groeiende vraag na huureiendom as gevolg van die kredietwet wat die aangaan van nuwe lenings demp.
Natuurlik is daar waarnemers wat met ons siening sal verskil en hang dit natuurlik ook af in watter geografiese area 'n belegging gemaak word.
Dit is hoekom die korrekte finansiële advies so belangrik is en waarom finansiële beslui-te in samewerking met 'n finansiële adviseur gedoen moet word.
Maak maar seker daar is iewers 'n baksteen of drie in u portefeulje.
