MOSSELBAAI NUUS - Die beplande vreedsame massa-optog wat Vrydag om 08:30 vanaf die munisipale kantore na die Punt sal vertrek, is nie party-polities gedrewe nie en deelnemers word gevra om swart aan te trek ter wille van eenvormigheid en solidariteit met die sentrale boodskap.
Optoggangers word ook dringend versoek om nie plakkate met haatspraak te vertoon nie, want dit sal nie strook met die doel van die vreedsame byeenkoms nie.
Dít is die versoek van Mosselbaai se uitvoerende burgemeester, Raadsheer Harry Levendal. Burgemeester Levendal sal die optog lei.
Die optog vertrek om 08:30 van die munisipale kantore tot by die Punt. Die gassprekers is Burgemeester Levendal en Vader Peter Rhodes van die Nativity Anglican Church.
Die optog sal in Marshstraat af beweeg tot by Point Village Hotel waar die toesprake sal plaasvind.
Vir persone wat nie oor vervoer na die munisipale kantore beskik nie, word vervoer beskikbaar gestel en die optelpunte is agter die KwaNonqaba Mall (Shoprite) en in D’Almeida by die Civic.
Besighede het reeds te kenne gegee dat hulle hul personeel die geleentheid sal gun om die optog by te woon.
'Ons bring jou die nuutste Mosselbaai, Tuinroete nuus'
