Jakes Deysel (44) beskryf sy lewe as ’n wonderwerk. “Ek was so te sê amper dood na ’n 9mm pistool in my rug leeggeskiet is.”
Deysel het sy merkwaardige verhaal met Rekord gedeel. Hy is 19 jaar gelede in Johannesburg deur ’n gewapende rower geteiken en in sy rug geskiet.
“Ek het as ’n private lyfwag gewerk en het die dag ’n man van Pakistan bank toe vergesel,” vertel Deysel. “Ek het vyf keer om die bank gery om seker te maak dat alles veilig was. Ons het gestop, uitgeklim en ek het skaars my voet op die sypaadjie neergesit toe ek die geweer teen my rug voel.”
Deysel sê hy het nie ’n koeëlvaste onderbaadjie aangehad nie. “Gelukkig het ek nie, want dan sou hy my deur die kop geskiet het.”
