MOSSELBAAI NUUS - Ondanks talle skriftelike versoeke aan al die verantwoordelike instansies, sommige reeds soveel as twee jaar gelede, berig lesers dat toestande op die wêreldbekende St Blaize-stap-roete, wat deel van die gewilde Oyster Catcher Staproete vorm, werklik skok.
Die roete is vervalle en op plekke heeltemal toegegroei en stappers kom daar weg met lelike skrape aan hul arms en bene weens die bosse wat hulle krap.
Daarbenewens maak die ruie bosse dit vir stappers onmoontlik om gevare soos pofadders wat gereeld daar voorkom, betyds waar te neem. Kennisgewingsborde op die roete is ontsier met walglike tekens wat daarop geverf is en, ondanks herhaalde klagtes die afgelope jare is die bord onveranderd. Dié kennisgewingsbord behoort na wat verneem word aan 'n privaat ontwikkelaar.
Vullisdromme wat op die roete aangebring is, is na bewering oorlopens vol en word skynbaar nie gereeld skoongemaak nie, terwyl riool sporadies op dele van die roete voorkom. Dìt alles, berig lesers, ontsier die roete en stel Mosselbaai in die oë van plaaslike en internasionale toeriste in 'n slegte lig.
"Rooipitjie en indringerbosse verdring die fynbos langs die roete. Op plekke moet 'n mens dwars draai en jou arms bokant jou kop hou om deur die bos te kan beur," berig 'n leser wat baie besorg is oor die beeld wat hierdie toestande by toeriste skep.
Sedert 2014
Ondanks ondernemings aan Raadslid Dirk Kotzé dat die roete teen die vakansietyd ontbos sou wees, blyk dit uit foto's wat op Woensdagoggend, 9 Desember geneem is, dat probleme steeds voorkom. Sowat 500m vanaf die ingang by Danabaai is die roete wel oopgekap, maar dis blykbaar waar dit ophou.
Toe die Mossel Bay Advertiser Raadslid Kotzé vir kommentaar nader, het hy onmiddellik weer alle betrokke instansies oor die toestande aangespreek en versoek dat dit dringende aandag moet geniet.
Meriete in klagtes
"Daar is baie meriete in hierdie klagtes," berig mnr Fred Orban, eienaar van die Oystercatcher Trail al baie goeie nasionale en internasionale reklame vir Mosselbaai en die St Blaize-roete gebring het, onder meer in top plaaslike en internasionale publikasies en films, die BBC se dokumentêre film "South Africa Walks", om enkele te noem.
Hy meen die St Blaize-roete word onderbemark. "Beter bemarking kan 'n groot bydrae tot werkverskaffing vir plaaslike inwoners lewer. Leemtes, soos die riool wat op plek-plek en van tyd tot tyd oorloop, en die swak
instandhouding van die roete, is egter wesenlike probleme. Dit sluit ook die gedeelte in wat oor Pinnacle Point Golf Estate gaan," aldus mnr Orban.
"'n Mens moet aanvaar dat dit nie 'n geplaveide voetpad is nie, maar, omdat die roete so uniek is, onder meer weens die kwaliteit uitsigte, plantegroei, walvis- en dolfynbesigtiging, en argeologie verdien dit baie meer aandag vanaf die verantwoordelike instansie, in hierdie geval die Munisipaliteit," meen mnr Orban.
Skoonmaak
Die Garden Route Casino Community Trust het vantevore fondse bewillig vir die skoonmaak, aanbring en opknapping van kennisgewingstekens wat noodsaaklik is omdat voetgangers kan afdwaal en in die bosse beland waar boosdoeners soms skuil.
"Mense verkies al meer ondervinding-toerisme en wil liewer opvoedkundig te voet in die natuur te wees as om verwyderd in voertuie rond te ry . Die oorsese mark, veral die Europeërs en Amerikaners voel sterk hieroor. Oorsese reise word weens die wisselkoers vir baie Suid-Afrikaners te duur. Plaaslike toeriste begin besef wat hier, veral die Wes-Kaap beskikbaar is.
"Mosselbaai veral, het 'n groter verskeidenheid natuur, mariene en argeologiese bates in een pakket as enige and kusgebied in die wêreld. Ons moet gebruik maak hiervan, maar dan moet dit saamgaan met 'n kwaliteit ervaring en die ondersteuning van die owerhede en die sakegemeenskap, meen mnr Orban.
'n Leser meen dat die hond nie op die roete aan 'n leiband gehou durf word nie, omdat die oorgroeide omstandighede op die wandelpad sal meebring dat óf die hond, óf sy eienaar daarin verstrengel sal raak.
Die munisipaliteit reageer
Die munisipale woordvoerder, mnr Harry Hill, het op klagtes oor die St Blaize-wandelpad hiernaas reageer:"Die Munisipaliteit besef terdeë watter bate die St Blaize-wandelpad is, maar word deur wetgewing beperk tot instandhouding slegs van gedeeltes wat oor munisipale eiendom loop.
Die gedeelte tot ongeveer 700 meter wat oopgesny is, is wel deur die Munisipaliteit gedoen. Die gedeelte waar die bord staan en die probleem oënskynlik op sy grootste is, is op private eiendom. Die gewraakte bord behoort aan die betrokke eiendomsontwikkelaar, en kan nie deur die Munisipaliteit verwyder word nie.
"Die gedeelte onder beheer van die Munisipaliteit begin daarna eers weer van die oostelike grens van die Pinnacle Point-gholflandgoed, en die Munisipaliteit is tans besig om instandhouding daar te doen. Benewens die munisipale eiendomme, loop die wandelpad loop oor altesame drie private eiendomme.
"Die entrepreneurs wat vir die Munisipa-liteit werk, maak gereeld die dromme skoon, maar dit gebeur ongelukkig oor naweke dat die dromme oorvol word. Die Munisipaliteit sal egter reël dat nog dromme daar geplaas word.
"Die Munisipaliteit is bewus van een geval waar riool oor 'n gedeelte van die pad geloop het.
Dit is veroorsaak deur 'n rioolpomp wat gebreek het, maar spoedig herstel is nadat die Munisipaliteit van die probleem bewus geword het. By hierdie geleentheid is ook groot hoeveelhede huishoudelike afvalmateriaal in die pype gevind wat tot verstoppings bygedra het.
"Die bord by die aanvang van die wandelpad waarop gesê word dat die Munisipaliteit die verantwoordelike gesag ten opsigte van die wandelpad is, is foutief in die sin dat dit sê die Munisipaliteit is die gesag vir die hele wandelpad. Dit is nie 'n munisipale bord nie, en is nie deur die Munisipaliteit opgerig nie.
"Die Munisipaliteit onderneem om vroeg in die nuwe jaar met die ander grondeienaars te skakel ten einde die situasie aan te spreek."
'Ons bring jou die nuutste Mosselbaai, Tuinroete nuus'
