MOSSELBAAI NUUS - Hoërskool Punt se topleerder, Roelindi Pretorius, het ingestem dat Mossel Bay Advertiser die emosionele oomblik toe sy haar matriekuitslae oopmaak, op ’n video vasvang.
Haar ma, Roelien, was ook daar om hierdie spesiale herinnering met haar te deel.
Soos Roelindi na die resultate gekyk het, het sy opgewonde haar punt vir Afrikaans met haar ma gedeel: “Mamma, ek het 97 vir Afrikaans!”
Sy het later vir die Advertiser gesê dié vak was nooit haar sterkpunt nie, maar sy en haar juffrou het bietjie ekstra tyd ingesit. “Sy het gesê ek moet my 95% kry, want sy voel ek kan dit doen.”
Verder is daar natuurlik nog so ’n paar 90’s - wiskunde, sê sy, is haar gunstelingvak. Sy het sewe onderskeidings ingepalm en spog met ’n uitstekende gemiddeld van 93.57%.
Oor twee weke is sy op pad na die Noordwes-Universiteit se Potchefstroom-kampus waar sy wiskundige wetenskappe gaan studeer.
VIDEO: Punt-topleerder sien vir eerste keer matriekuitslae
‘Ons bring jou die nuutste Tuinroete, Hessequa, Karoo nuus’
