"Selfs die verlies van net een lewe is een te veel, en die lewensredders van Mosselbaai omgewing is ongelukkig oor die voorval die afgelope naweek waarin drie kinders by Diasstrand verdrink het. Trouens, een van ons Nippers, 'n leerling lewensredder, het een van die vier kinders wat in die see in die moeilikheid beland het, gered."
Toesig
"Selfs al is daar lewensredders, moet volwassenes toesig oor hul minderjariges hou. Onervare volwassenes wat die see nie ken nie, sou skaars 'n kans gestaan het teen die sleurstrome wat Sondag by Diasstrand geheers het," meen mnr Prins.
Volwassenes kan egter onmiddellik alarm maak en daar is meesal ervare swemmers teenwoordig wat sal kan help.
Die Mossel Bay Surf Life Savings Club het 'n kontrak met die Mosselbaai Munisipaliteit om vanaf 1 Desember tot en einde Januarie diens op Mosselbaai se strande te doen, hoewel dienste net op die Blouvlagstrande tot einde Januarie strek.
Jaarliks dien hulle 'n bedryfsbegroting vir hierdie dienste by die munisipaliteit in, maar hierdie jaar was die boodskap 'slyp julle potlode', daar is nie fondse genoeg om die gekwoteerde bedrag ten volle te betaal nie, aldus mnr Prins.
Dienste word op strande vanaf Glentana tot by Boggomsbaai gelewer. Daar is egter geen lewensreddersdienste op Danabaai, 'n besonder gevaarlike strand, beskikbaar nie.
Drie lewensreddersklubs lewer deur die loop van die jaar wel vrywillige lewensreddersdienste op strande in die Mosselbaai-omgewing. Op Santosstrand doen die Marlin Lewensreddersklub diens, die Southern Cross Lewensredders sien na De Bakkestrand om en die Mossel Bay Surf Life Savers lewer dienste by Diasstrand.
Hierdie dienste is kern tot die opleiding van lewensredders en bied aan hulle die geleentheid om noodsaaklike ondervinding op te doen.
In piektye word addisionele lewensredders aan veral Hartenbos en Santosstrand toegewys. Lewensredders werk ook skofte om te verseker dat hulle deurentyd paraat kan wees.
Net meer as 100 lewensredders is per dag ontplooi. By Diasstrand is sedert 21 Desember agt lewensredders per dag ontplooi, wat daagliks dienste aan tussen 400 en 600 mense moes lewer.
Dienste onontbeerlik
Tydens die afgelope piek vakansieseisoen, het lewensredders by twee geleenthede die strand op Diasstrand toegemaak omdat sleurstrome te gevaarlik was. Toe is swemmers tot die vlakwater beperk.
In ander gevalle is strandgebruikers tot sekere areas beperk.
Lewensredders het daagliks soggens self die see aangedurf om vas te stel wat die seetoestande en veral die gevaar van bestaande seestrome op die strande waar hulle diens gedoen het, was.
"Die ideaal is dat daar ingevolge bestaande protokolle te alle tye minstens drie lewensredders op elke strand behoort te wees: een wat fisiese redding kan doen indien nodig, een wat met handseine bystand kan verleen en 'n ander wat die swemmer bystaan."
Die onderskeie lewensreddingsklubs is voornemens om binnekort met die Mosselbaai Munisipaliteit te vergader oor 'n lewensvatbare operasionele plan.
"Die ideaal is dat lewensredders ten minste elke naweek tot na einde April op al Mosselbaai se strande diens sal doen," meen mnr Prins.
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
