MOSSELBAAI NUUS - Karet-skilpadjies het die naweek begin uitspoel op strande.
Karet-skilpaaie is ‘n bedreigde spesie en word deur wetgewing en streng protokol beskerm. Daarom is dit onwettig om die gestrande skilpaaie in gevangeskap aan te hou en alle skilpaaie moet aan die owerhede gerapporteer word.
Die uitgespoelde skilpaaie weeg ongeveer 30 gram en baie van hulle is redelik swak. Hulle kan ook oortrek wees met parasiete en skulpdiere. Laasgenoemde dra daartoe by dat die skilpaaie amper dubbel hulle gewig moes dra, wat die afduik om na hul gunsteling voedsel (jellievis en bloublasies) te soek, feitlik onmoontlik maak het. Talle word ook die prooi van seevoëls of krappe en moet soms met halwe vinne oor die weg kom.
Die skilpaaie word plaaslik deur Dr Frans De Graaff gestabiliseer en so spoedig moontlik na of Bayworld in Port Elizabeth of die Two Oceans Akwarium in Kaapstad gestuur vir rehabilitasie en vrylating.
Meer oor Karet-skilpaaie
Karet-skilpaaie, algemeen bekend as “loggerheads”, handhaaf ‘n lae re-produktiwiteit. Hulle kan tot 67 jaar oud word en bereik eers seksuele volwassenheid tussen 17 en 33 jaar.
Die skilpaaie broei aan die Natalse Noordkus uit en beweeg dan af in die Agulhas-stroom. Die uitspoel van die skilpaaie is ‘n jaarlikse gebeurtenis, veral as daar vroeë kouefronte deurkom. Die watertemperatuur daal te vinnig en hulle raak hipotermies en met die ekstra las van bakterieë en skulpdiere, is hulle te swak om in die koue seestrome te oorleef.
Indien skilpaaie op strande teëgekom word, geld die volgende:
- Verwyder die skilpad van die strand af
- Moet dit nie in die see terugplaas nie
- Plaas die skilpad op ‘n klam handdoek of sagte lap in ‘n houer met voldoende lug by kamertemperatuur
- Kontak een van die onderstaande instansies/persone:
• DIE DIAS SKULPMUSEUM EN AKWARIUM - 044 6911032
(Weeksdae 08:00 – 15:45, Saterdae 13:00 – 15:45, Sondae en Publieke vakansiedae 09:00 – 15:45)
• TERSIA MARAIS (S.M.A.R.T) - 072 227 4715
• S.M.A.R.T (Stranded Marine Animal Rescue Team) - 076 780 8237
'Ons bring jou die nuutste Mosselbaai, Tuinroete nuus'
