MOSSELBAAI NUUS - ’n Mosselbaaier, André van der Nest (64), is Vrydag, 11 April, oorlede.
Van der Nest was ’n bekende in die nooddienste en was vir meer as 40 jaar ’n paramedikus by die Mosselbaai-ambulansdienste nadat hy in 1987 daar aangesluit het.
Latere jare het hy ’n sleutelrol in die stigting van die By Grace-ambulansdienste op Mosselbaai gespeel.
“Deur sy lewe het my pa alles in sy vermoë gedoen om ander te help, sonder om ooit iets daarvoor terug te verwag,” sê sy seun, André jr.
Van der Nest het in die gemeenskap bekend gestaan as ’n pilaar van ondersteuning vir talle vriende en gemeenskapslede, veral dié wat aan ongeneeslike siektes ly, deur sy kennis, praktiese sorg en emosionele ondersteuning aan te bied.
Hy was aktief betrokke by die St. Blaze Mosselbaai Lionsklub.
“Een van sy trotsste prestasies was om die blindenavigatorstydren in 2021 na Mosselbaai te bring, ’n inisiatief wat hy uit pure liefde vir mense ’n werklikheid gemaak het, sonder enige persoonlike voordeel,” sê André.
Sy geliefdes beskryf hom as ’n vriendelike, nederige en hardwerkende man wie se stille krag en diep medelye ’n blywende indruk op almal wat hom geken het, gelaat het.
“My pa het altyd ander eerste gestel, dikwels ten koste van homself. Hy het sy eie gemak opgeoffer, fisies sowel as finansieel, om ander te help. Sy lewe is ’n pragtige voorbeeld van onselfsugtigheid, naasteliefde en medelye.”
Van der Nest word oorleef deur sy lewensmaat van 32 jaar, twee kinders, twee stiefkinders en 10 kleinkinders.
Geen begrafnisreëlings is nog teen die ter perse gaan bekend gemaak nie.
‘Ons bring jou die nuutste Tuinroete, Hessequa, Karoo nuus’
