MOSSELBAAI NUUS - Stoomtreinentoesiaste op Mosselbaai soek ou olie - hetsy petrol of diesel - wat inwoners van ontslae wil raak.
Hulle is besig om 'n 'grand old dame' stoomlokomotief uit die roes van vergetelheid te herwin met die hoop dat sy eersdaags weer diens sal doen op die spoorlyn tussen Ceres en Kaapstad.
Hierdie ou lokomotief was die eerste om jare gelede in Mosselbaai van steenkool na olie omgebou te word, voordat sy vir daarna ondermeer juis op die Ceres-spoorlyn en in Namibië aangewend is.
Daarna het haar paadjie weer na Mosselbaai gelei waar sy uit diens gestel en aan die wind en weer oorgelaat is in die lokomotief-begraafplaas op die dorp.
'n Sakeman van Ceres het die ou lokomotief intussen gekoop en sy word nou in Mosselbaai tot haar oorspronklike glorie herstel. Om te sien of sy genoeg druk kan opbou om al die nodige druktoetse te slaag voordat sy weer die lang pad Ceres toe aandurf, moet hulle met ou olie haar weer brand maak.
Enige persoon is welkom om Chris Boshoff by 082 372 8687 te kontak of om enige ou olie by die Transnet werkswinkel, vir aandag mnr Rudmann, af te gee.
Entoesiaste word ook uitgenooi om self te kom sien hoe hierdie restourasieproses vorder en die ou olie waaroor hulle beskik, saam te bring. Indien nodig, sal Chris die olie afhaal.
'Ons bring jou die nuutste Mosselbaai, Tuinroete nuus'
