MOSSELBAAI NUUS - Nóg 'n vakansieganger, 'n vrou, is op Diasstrand beroof. Die voorval volg op 'n string vorige aanvalle en rooftogte op Diasstrand en Louis Fourieweg die afgelope paar maande.
Die slagoffer, wat saam met haar man op Mosselbaai met vakansie was, het op Donderdagoggend, 9 Februarie om ongeveer 10:00 op die strand naby die rotse geloop. Volgens die Da Gamaskop-polisiekommunikasiebeampte, kapt Wollie Fourie, het die slagoffer mense op die rotse sien staan.
"Sy is deur een van die persone genader en is op Afrikaans aangesê om haar handsak en kamera te oorhandig."
Volgens kapt Fourie het die verdagte, nadat die geskokte vrou haar besittings aan hom oorhandig het, daarmee weggehardloop. "Haar selfoon was ook in die handsak."
Die Da Gamaskop-polisie ondersoek 'n saak van roof.
* Op Sondag, 5 Februarie, het 'n fietsryer, Lydia de Lange (59) om 07:15 teen 35km per uur met haar fiets op Louis Fourieweg, naby die Blue Waters-huis gery toe twee mans die fiets onder haar uitgeruk het. De Lange is met 'n mes gedreig en het weens die val verskeie beserings opgedoen. Haar aanvallers het leë hande gevlug nadat 'n voetganger tot De Lange se redding gekom het.
"Die nodige permitte van die departemente omgewingsake, bosbou en CapeNature is bekom om bosse op munisipale grond neffens Pansy Cove uit te roei nadat volgens talle berigte blyk dat misdadigers hulle langs Louis Fourieweg hier skuilhou en 'n gevaar vir inwoners meebring," het die munisipale bestuurder, adv Thys Giliomee, by navraag aan die Mossel Bay Advertiser bevestig.
Dit het gevolg op berigte van 'n brand laat Dinsdagaand langs Louis Fourieweg.
Dit blyk dat dit 'n beheerde brand was wat, ideaal-gesproke, laat aand onderneem is sodat verkeer op die besige deurpad nie te veel ontwrig is nie. Boonop moes die Brand en Rampbestuursdienste ook die windrigting monitor vir 'n land-af wind wat rook oor die see sou waai.
Omdat die wortelstokke van die bosse op die duine nie deur die beheerde brand vernietig word nie, word verwag dat die plantegroei daarlangs sal herstel soos wat tans die geval is op grond in die Danabaai-omgewing wat in Desember 2016 onder verwoestende brande deurgeloop het.
Daar is ook veral deeglik seker gemaak dat die melkhoutwoud nie in gedrang kom nie. Boonop word beplan om die melkhoute te snoei sodat dit nie skuilplek aan ongewenste elemente bied nie.
Twee slagoffers van onlangse roofvoorvalle in die Diasstrand-omgewing het hierdie man as die waarskynlike aanvaller uitgeken. Hy is beskryf as baie slank, in sy middel tot laat twintigerjare en met ‘n baie donker gelaat. Hy het Engels met ‘n baie swaar aksent gepraat. Enige persoon wat hom dalk herken of moontlik weet waar hy en sy meeloper hulle bevind, word versoek om die ondersoekbeampte van die Da Gamaskop-polisie, Adjudant-offisier Deon Louw (044 606 2200 of 082 501 0004) te kontak.
Klik hier vir vorige artikels:
- Robbers strike again at Diaz Beach
- Vakansiegangers by misdaad-brandpunt beroof
- Joernalis net nog 'n misdaadslagoffer
- Kapers op Louis Fourieweg bedrywig
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
