MOSSELBAAI NUUS - Reece Meyer, 'n graad 11-leerder aan Hoërskool Punt, is as junior burgemeester van Mosselbaai verkies.

Reece (17), sê dié prestasie voel surrealisties en dat hy homself nog nooit in 'n posisie soos dit gesien het nie.

Die Junior Dorpsraad (JTC) bestaan uit sewe uitvoerende poste en word ingeneem deur leerders van skole regoor die breër Mosselbaai-omgewing. Twee leerders van elk van die sewe skole vul 'n setel op die JTC, waarvan Reece die leier is.

Om dit meer spesiaal te maak, is Kim Petersen, Reece se beste vriend en 'n leerder by Curro, as junior onder-burgemeester verkies.

Reece is sedert die einde van sy graad 10-jaar by die JTC betrokke. Hy het aanvanklik nie sy visier daarop gestel om die hoogste pos in dié raad te vul nie. Hy het gevoel dat hy nog nie gereed was nie. In plaas daarvan het Reece gemik na die pos van onder-burgemeester, waartoe hy uiteindelik verkies is.

Nou in sy graad 11-jaar, het Reece besluit om homself te beywer vir die pos as junior burgemeester.

Sy veldtog-toespraak was nogal slim en innoverend. Reece het legkaartstukke gebruik, wat sy raadslede moes voorstel en verteenwoordigend was hoe Reece dinge as junior burgemeester sou bymekaar hou.

Sy pligte as junior burgemeester moet nie geringskat word nie. Dit sluit in die beheer en toesig oor raadsvergaderings, kontak met ander jeugrade om inligting te deel en selfs die bywoning van regte Mosselbaai-raadsvergaderings en die skouers skuur met burgemeester, Dirk Kotzé, en sy uitvoerende beamptes.

Tussen openbare redevoering, debatkompetisies, sy pligte as sy skool se kultuurhoof en werk aan die skoolkoerant, is Reece nie onbekend met 'n besige skedule nie.

Hy het aan die Mossel Bay Advertiser gesê: "Ek is nie senuweeagtig om dié rol te aanvaar nie. Ek ken myself, en ek floreer onder daardie druk om altyd besig te wees."

Toe hy gevra is of dit 'n hoogtepunt van sy skoolloopbaan tot dusver is, het Reece geantwoord: "Ek sal dit vir altyd onthou." 

‘Ons bring jou die nuutste Tuinroete, Hessequa, Karoo nuus’