MOSSELBAAI NUUS - Benewens geraasstoornisse, is afvalwater wat in die Mosselbaai-gholfklub se werke-afdeling ontstaan 'n groot rede tot kommer vir 'n jong egpaar wat ondanks herhaalde pogings steeds geen resultate op hul herhaalde klagtes oor higiëne en omgewingsbesoedeling kry nie.
Na wat verneem word, word tuinbou-implemente soos trekkers, grassnyers, spuitkanne en dies meer gereeld op die gholfklub se werksplaas, wat eens die opsigterswoning was, gewas en die afvalwater word toegelaat om ongestoord in 'n openbare pad af te vloei, ongeag die waarskynlikheid dat dit besoedelde water en/of selfs gifstowwe of brandstofreste mag bevat.
Volgens die egpaar kon geen gesprekke, bemiddelinge, of selfs regsadvies nie, oor die afgelope vier jaar skynbaar die gholfklub se bestuur oorreed om in die gees van goeie buurskap by onderhandelde ooreenkomste te hou om probleme op te los nie.
Die egpaar beweer die gholfklub het aanvanklik afvalwater toegelaat om vrylik op hul werf uit te loop. Na klagtes het gholfklubpersoneel na bewering wederregtelik 'n gat in die skeidsmuur tussen die eiendomme gemaak sodat afvalwater, wat ontstaan wanneer toerusting gewas word, deur die egpaar se erf en oor munisipale paaie tot in die dorp se stormwaterstelsel vloei.
Hierdie water, wat soms groen of oranje gekleur is, kan na bewering brandstof-, kunsmis- en selfs gifreste bevat wat onbelemmerd op hul erf en in die dorp se stormwaterafvoere beland.
Sedertdien het die gholfklub se personeel 'n sloot met 'n pyp in oor die sypaadjie voor die egpaar se woning gemaak wat uitmond net voor hul oprit. Dit bring mee dat daar gedurig modder, afvalwater en stagnante waterpoele voor hul woning voorkom waar die egpaar en/of hul besoekers in- en uit motors moet klim.
Die gholfklub is, na wat verneem word, reeds in 2011 gemaan om 'n put vir hierdie afvalwater te installeer en is na bewering in Oktober 2015 en Januarie 2016 weer deur die munisipaliteit hieroor aangespreek. Die munisipaliteit het intussen die gholfklub volgens die egpaar skynbaar verdere grasie tot September 2016 toegestaan vir die aanbring van dié afvalwaterput. Die gholfklub beweer onder meer in skrywes aan die egpaar dat die fondse vir hierdie bouwerk aan die put ontbreek.
Tog, sê die egpaar, is afdakke by die store skynbaar sonder die nodige oorskrydingsmagtiging aangebring en oorskry dit die boulimiete. Volgens 'n skrywe van die munisipaliteit se bestuurder: boubeheer, munisipale eiendomme en buitereklame, beplanning en geïntegreerde dienste, is die gholfklub onlangs kennis gegee om nie met dié bouwerk voort te gaan nie.
Die gholfklub parkeer hul toerusting hier, nòg nader aan die egpaar se woning, wat die geraasstoornis douvoordag eweneens vererger. Die Mosselbaai-gholfklub huur die gholfbaan van die Mosselbaai Munisipaliteit reeds vir tientalle jare teen 'n skamele R10 per jaar.
Ontelbare versoeke, besoeke, onderhandelings, skrywes en bemiddelinge tussen die egpaar en die uitvoerende burgemeester, raadslede, die munisipale bestuurder, gemeenskapsleiers en amptenare het vir dié egpaar op niks uitgeloop nie.
Herhaalde beroepe op die Wes-Kaapse LUR vir plaaslike regering, om gewingsake en ontwikkelingsbeplanning, minister Anton Bredell, het geen uitkoms gebied nie.
In 'n skrywe aan een van die raadslede wat probeer bemiddel het, sê die bestuurder van die gholfklub: "dit is ons opinie dat ons onregmatig geteiken word, en gevolglik was ons reeds by Kol Haggard (hoof van die SAPS MB) om die aangeleentheid aan te meld. In ons opinie is die manier wat die Klub hanteer word onregmatig en word ons finansieël in 'n risiko geplaas deur die onlangse gebeure.
Ons is ook nie seker of die saak enigsins opgelos sal kan word nie."
Die modderbad is na bewering die gevolg van onwettige waterstorting deur die personeel van die gholfklub.
Lees verwante artikels:
- Geraas maak 'gesin se lewe hel'
- Mosselbaai-gholfklub: Teendeel tot beweringe
- Mosselbaai-gholfklub: Bestuur reageer
- Mossel Bay Golf Estate: Call to Paryer 'noise' disturbs
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
