MOSSELBAAI NUUS - Tydens 'n drie uur lange uitspraak op Dinsdag, 9 Mei het Mosselbaai-streeklanddros Makamandela 'n 42-jarige man van Tergniet wat daarvan beskuldig is dat hy sy bejaarde ma verkrag het, op dié aanklag vrygespreek.
Die beskuldigde het in sy bekentenis erken dat hy aan sy 79-jarige ma se borste gevat, haar gesoen en met haar seks gehad het.
Die beskuldigde se ma, wat intussen aan natuurlike oorsake oorlede is, het ook 'n verklaring afgelê waarin sy die beweerde verkragtings beskryf.
Die ma het tydens die beweerde voorval saam met haar ouer seun, dié se vrou en 9-jarige stiefdogter, asook die beskuldigde gewoon.
Makamandela het tydens haar uitspraak gesê dat die staat nie sy saak bo redelike twyfel kon bewys nie. Sy het ook gesê dat daar geen datum van die beweerde verkragting in enige dokumentasie verskyn nie.
'n Voorval waartydens die bejaarde vrou se ander seun, sy vrou en dié se dogter laataand by die huis gekom het en die bejaarde vrou in 'n deurmekaar toestand naak op haar bed aangetref het, was volgens Makamandela nie genoegsame bewyse dat die beskuldigde, wat tydens die voorval by die huis was, sy ma verkrag het nie.
Makamandela sê die feit dat die bejaarde vrou geweier het om hospitaal toe te gaan na die voorval, het nie die staat se saak gehelp nie. Mediese getuienis sou volgens Makamandela bydra tot 'n sterker saak om die verkragting te bewys.
Die beskuldige is wel skuldig bevind op twee aanklagte van crimen injuria. Dié twee aanklagte spruit uit afsonderlike voorvalle waartydens die man vuil onderklere van sy ma, die onderklere van die 9-jarige meisie asook dié van die meisie se ma onder sy bed versteek het.
Tydens die verhoor is getuig dat die slagoffers se onderklere uit die wasgoedmandjie verdwyn het. Die beskuldigde het glo erken dat hy daaraan "geruik" het.
Hoewel die beskuldigde van die verkragting van die 9-jarige meisie aangekla is, het Makamandela hom slegs skuldig bevind op 'n aanklag van seksuele aanranding. Die slagoffer het tydens haar getuienis in camera aan die hof op 'n speelgoedpop gedemonstreer hoe en waar die beskuldigde aan haar gevat het.
Makamandela sê die demonstrasie het slegs op seksuele aanranding gedui en nie op verkragting nie.
Op die seksuele aanranding klag is die beskuldigde tot ses jaar gevangenisstraf gevonnis waarvan drie jaar opgeskort is.
Louise Luterek het vir die verdediging opgetree en Reinet de Waal vir die staat.
Klik hier vir vorige artikels:
- Opvolg: Man verkrag glo ma
- 'Ma-verkragter': Kruisondervraging bring onthullings
- Man verkrag glo ma: Getuie kruisondervra
- 9-Jarige getuig in verkragtingsaak
- Man verkrag glo ma en dogtertjie
- Man wat glo ma verkrag vandag in hof
- Vermeende ma-verkragter vandag in hof
- Man wat glo ma verkrag se verhoor begin
- Man verkrag glo bejaarde ma
- Man verkrag glo ma
- Hoë profiel hofsake vandag op die rol
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
