MOSSELBAAI NUUS - Mosselbaaiers en besoekers se gereelde Sondagmiddagrit om die Punt, het op Sondag, 26 April in 'n verkeersknoop ontaard na twee afsonderlike voorvalle in Marshstraat.
Die Mosselbaai Polisie doen ‘n geregtelike doodsondersoek nadat ‘n 63-jarige man homself in ‘n voertuig, wat voor ‘n restaurant naby Milkwood Primêre Skool in Marshstraat geparkeer was, doodgeskiet het.
Die man, wat oorspronklik van Namibië is, was volgens die woordvoerder van die Mosselbaai Polisiestasie, Ao Pieter Koekemoer, saam met sy vrou en kind toe hy hom na bewering op die agterste sitplek van ‘n voertuig geskiet het. Die voorval het om 15:40 gebeur.
Volgens Ao Koekemoer is die oorledene se gesin reeds terug in Namibië en word geen gemenespel vermoed nie.
Die eienaar van die restaurant Route 57, Anzelle Zeelie, sê die besigheid was oop toe die tragiese gebeure plaasgevind het.
"'n Kar het gestop en ons het 'n vrou hoor skree, waarna daar 'n geweerskoot afgegaan het. Ons het na buite gegaan en die vrou en haar dogter ondersteun. Niemand was in gevaar nie. Ons het net die vrou en die kind baie jammer gekry. Dit was nie 'n aangename ervaring nie."
Kort na die voorval het 'n vrou voor Shoprite in dieselfde straat na bewering 'n epileptiese aanval gekry en met haar voertuig in 'n ander motor vasgery.
Volgens die woordvoerder van die Mosselbaai Polisiestasie, Ao Pieter Koekemoer, het die bestuurder van 'n Ford Fiesta om ongeveer 16:15 met haar voertuig teen 'n Nissan bakkie, wat aan 'n 66-jarige man van Bayview behoort, vasgery.
* Die Groot-Brakrivier Polisie ondersoek twee afsonderlike voorvalle van selfmoord óók die afgelope naweek. In die eerste voorval het ‘n 45-jarige man van Reebok vermoedelik ‘n oordosis pille geneem en ‘n 28-jarige man van Green Haven het homself na bewering opgehang. Beide voorvalle word deur die polisiestasie se speurdiens ondersoek.
Klik hier onder vir vorige artikels:
- Botsing in Marshstraat
- 2 mans pleeg selfmoord op Groot Brak
- Opvolg: Man doodgeskiet voor Marshstraat
- Man doodgeskiet in Marshstraat
'Ons bring jou die nuutste Mosselbaai, Tuinroete nuus'
