MOSSELBAAI NUUS - Erika Primêre Skool op Mosselbaai sal binnekort twee nuwe aanstellings by dié skool hê.
Lionel Kennedy en Nicole Adriaans sal van Januarie 2025 hul pligte as die skool se nuwe onderhoof en departementshoof, begin.
Vir Adriaans, is dit 'n groot seën van God.
Sy het reeds tien jaar ondervinding as opvoeder en het reeds twee keer onderhoude gevoer vir die pos as departementshoof.
Nou, sê sy, het die geleentheid op die regte oomblik vir haar aangebreek.
"Ek is nie regtig senuweeagtig nie. Ek is 'n bietjie oorweldig, maar terselfdertyd ook baie gelukkig," het sy vir die Mossel Bay Advertiser vertel.
As 'n gebore-Georgiet, het sy in die Kaap groot geword. Erika Primêr is al 'n geruime tyd 'n tuiste vir haar as pedagoog. Sy het in 2018 as ’n gewone onderwyser begin, maar het in 2019 weggestap.
Lionel Kennedy, die nuwe onderhoof by Erika Primêr.
In 2020, tydens Covid-19, het sy teruggekeer en uiteindelik die rol as waarnemende departementshoof aanvaar, wat sy vir twee jaar beklee het.
Die twee jaar se ondervinding het haar voorberei vir dié oomblik. "Die regte werk begin nou," sê sy.
Kennedy, 'n inwoner van Groot-Brakrivier, sê hy is baie opgewonde oor die toekoms.
Sy tyd by Erika Primêr het in 2017 begin. Sedert 2022, was hy 'n departementshoof by dié skool.
Kennedy se aanstelling as onderhoof is reeds 'n geruime tyd aan die gang. Sewe maande ná sy onderhoud vir dié pos, het hy uiteindelik daardie verwelkomende aanvaardingsbrief ontvang.
"Dit was 'n uitdagende jaar," sê hy, "maar ek glo dit gaan wonderlik wees."
‘Ons bring jou die nuutste Tuinroete, Hessequa, Karoo nuus’
