MOSSELBAAI NUUS - Na agt dae is die vermiste tiener van die Groot-Brakrivier Sekondêre Skool, Lesley-Ann Maya (17), se liggaam op Saterdag, 18 April naby Klein-Brakrivier gevind.
Die graad 11-leerder is tussen riete, skaars 1km van haar huis in Powertown deur haar ouma, Lena Williams, gekry. Familie het sedert Maandag, 13 April na haar gesoek.
Volgens Lena hét die familie vroeër ook by die riete gesoek, maar toe niks gesien nie.
"Ek het eers gedink dis 'n pop wat daar lê. Daar was polistereen ook oor haar gepak. Ek het dit weggeskuif en toe die pienk slaapklere herken. Toe wéét ek dis Lesley-Ann. Dit was 'n verskriklike gesig om te aanskou."
Lesley-Ann was toegegooi onder takke en 'n ou mat. Daar was sand op haar gesig en sy het op haar rug gelê. Die hempie wat sy aangehad het was opgetrek, haar broekie was om haar enkels en die pienk slaapbroek wat sy tydens die aand van haar verdwyning op 10 April aangehad het, was om haar bobene gespan. Daar was ook 'n dun toutjie om haar nek.
'n Nadoodse ondersoek wat kort na die grusame ontdekking gedoen is, het aangetoon dat Lesley-Ann verwurg is. DNS toetse is weggestuur om die polisie in die ondersoek te help.
Teen druktyd was daar nog geen verdagtes in verband met die moord gearresteer nie.
'n Gemeenskapleier van Powertown, mnr Colin Syfers (44), sê die mense van Powertown is in twee groepe verdeel. "Ons staan nie meer as een span saam nie. Daar is 'n geweldige slegte element van jongmense in Powertown wat met dwelms betrokke is en ons kinders sukkel met dwelmverslawing. Wat met Lesley-Ann gebeur het mag nie deur ons mense geduld word nie."
Volgens Colin het hy die ergste verwag toe die oorledene se familie bevestig het dat sy nie haar klere gevat het toe sy die aand laas lewend gesien was nie. "Ek het geweet iets moes met haar gebeur het en ek het heeltyd vermoed haar liggaam is in Powertown."
Lesley-Ann se ouma, Lena, het aan die Mossel Bay Advertiser gesê dat haar hart stukkend is oor haar kleinkind se wrede dood. "Ek mis haar klaar so baie. Sy was so 'n mooi en vriendelike mens. Lesley-Ann het nie verdien om so dood te gaan nie."
Die raadslid vir die omgewing, Gibo Gerber, het Lesley-Ann se dood as 'n absolute tragedie beskryf.
"Ons is geskok dat 'n jong mens in die fleur van haar lewe weggeruk is."
Gerber sê die misdaadsituasie in die gebied moet op 'n breër vlak hanteer word. "Die gebied kry die ondersteuning van kindersorg, die polisie, kerke, die buurtwag en verskeie ander rolspelers. Die wil is daar, maar ons ontbreek die middele. Partykeer is daar slegs een vangwa om die gebied te patrolleer." Gerber sê die gemeenskap staan in skok met dit wat gebeur het.
Liefde vir sport
Tydens die Mossel Bay Advertiser se besoek aan die familie kort nadat Lesley-Ann se lyk gevind is, het Remona trots die string medaljes wat Lesley-Ann vir sport gekry het gewys.
"Sy was so lief vir sport. Sy het in haar laerskooldae 'n beurs by 'n spogskool in Florida, Johannesburg ontvang. Ons het haar gestuur, maar sy het na 'n ruk huistoe verlang en terug gekom. Sy was 'n wonderlike kind en het altyd met die klein kindertjies van Powertown gespeel."
Lesley-Ann het twee jaar gelede swanger geraak en 'n seuntjie gekry. "Hy mis sy ma en vra heeltyd waar Lesley-Ann is."
Remona sê haar enigste dogter was altyd ook lief daarvoor om te dans.
Lesley-Ann se roudiens vind plaas op Saterdag, 2 Mei, om 09:30, by haar familie se huis in Powertown. Die roudiens word vanuit die AGS Kerk in Groot-Brakrivier om 11:00 gehou.
Die Suid-Kaap Polisiewoordvoerder het 'n beroep op die gemeenskap gedoen om na vore te kom met inligting en die ondersoekbeampte in die saak, Ao Paul Scheepers, te kontak by 044 620 8309.
Klik hier vir vorige artikels:
- Liggaam in Klein Brak gevind
- Waar is Lesley-Ann?
- 17-jarige meisie steeds vermis
- 17-jarige Groot Brak-meisie vermis
ARTIKEL: LOUISE KARSTEN, MOSSEL BAY ADVERTISER JOERNALIS.
