MOSSELBAAI NUUS - Die bevelvoerder van die KwaNonqaba Polisie, Lt Kol Johan Braaff, 'n verteenwoordiger van die Departement Onderwys, mnr Buys en gemeenskapswerkers het op Maandag 19 Januarie van deur tot deur in die Endlovini area van KwaNonqaba gegaan om ouers aan te moedig om hul kinders op 21 Januarie skool toe te stuur.
"Ingevolge wetgewing is dit verpligtend dat alle kinders van skoolgaande ouderdom wel sal skoolgaan en ouers of voogde wat hul kinders nie skool toe stuur nie, of kinders verhinder om skool te gaan, oortree die wet en kan krimineel vervolg word.
"Die KwaNonqaba Polisie wil seker maak dat ouers bewus is van hierdie wetlike verpligting sodat hulle kan verseker dat hul kinders wel skoolgaan," berig Lt Kol Braaff.
Hy het bygevoeg dat dit ouers se verantwoordelikheid is om seker te maak dat hulle kinders nie stokkies draai en sonder goeie rede van die skool wegbly nie.
"Dit blyk dat vervoer na en van die skole vir ouers 'n wesentlike probleem is, en dat baie ouers nie oor die fondse beskik om hul kinders behoorlik vir die skooljaar toe te rus nie. Ouers vind dit moeilik om skoolklere en -boeke te bekostig," berig die KwaNonqaba SAPD woord-voerder, sers Kapp.
Die inligting sal nou deur die Departement van Onderwys verder geneem word in 'n poging om die ouers van hulp te wees.
Dit blyk dat skooltoelating en veral vervoer na en van skool 'n besondere probleem vir talle ouers is.
Sommige areas soos Danabaai en Sonskynvallei beskik nie oor skole nie en ouers moet noodwendig ekstra begroot vir skoolvervoer.
Sommige ouers wil hul kinders in spesifieke skole registreer ter wille van huistaal, taalvoorkeure of vakkeuses, maar die skole in Mosselbaai is maande voor die tyd reeds tot barstens toe vol.
Met die toename in migrasie na Mosselbaai is daar ook 'n wesentlike behoef-te aan meer Engelse skole.
In Sonskynvallei het ouers die 2015 akademiese jaar met gemengde gevoelens tegemoet gegaan omdat die Departement Onderwys hulle laat in 2014 in kennis gestel het dat hul kinders se amptelike skoolvervoer na en klastoelating in Brandwag in 2015 gekanselleer.
"Die kennisgewings het ons net voor skool-sluiting laas jaar bereik, ons het vergaderings gehad en is ingelig dat ons kinders in Laerskool Hartenbos geplaas sal word, maar later het ouers briewe gekry om te sê daar is nie plek in Laerskool Hartenbos nie," berig Mirriam Afrika, 'n gemeenskapsleier van Sonskynvallei.
Hartenbos Laerskool se skoolhoof, mnr Barry Oosthuizen, het aan die Mossel Bay Advertiser berig dat die Sonskynvallei-leerders sowat twee kilometer skool toe moet stap.
"Daar is 'n werklike behoefte aan 'n skool op Sonskynvallei. Laerskool Hartenbos bedryf reeds 'n graad R klas in Sonskynvallei om die kinders skoolgereed te kry en behaal bepaalde suksesse in hierdie verband.
Vir sover moontlik akkommodeer ons alle aansoeke om toelating, maar ons graad 3 en graad 7 klasse is vol en kan onmoontlik nie meer leerders inneem nie," aldus mnr Oosthuizen.
Hartenbos Laerskool bied tans onderwys aan 917 leerders en die skool se beheerraad befonds 17 addisionele onderwysposte, waarvan 14 net op akademie gerig is.
Bestaande fasiliteite soos die skool se stoor, biblioteek, houtwerk- en laboratoriumfasiliteite is reeds in ekstra klaskamers omskep om in die ekstra aanvraag te voldoen.
Desondanks kan daar nie aan die behoefte aan meer plasings in die skool voldoen word nie.
Mnr Oosthuizen berig ook dat die nuwe leerders vanjaar bykans almal toegerus by die skool opgedaag het, en in gevalle waar daar nie aan alle vereistes voldoen kon word nie, het die skoolgemeenskap teen die einde van die eerste skooldag toegesien dat alle leerders oor alle klere, skryfbehoeftes en ander benodigdhede beskik het.
Ten spyte van skriftelike navrae aan die departement van onderwys, is daar teen druktyd geen terugvoer ontvang nie.
Die KwaNonqaba Polisie het op Maandag 19 Januarie van deur tot deur in die Endloveni woongebied in KwaNonqaba ouers van skoolgaande jeug besoek om seker te maak dat alle kinders van skoolgaande ouerderdom wel op Woensdag 21 Januarie vir die 2015 skooljaar aanmeld. Van links is Sers Tomela van die KwaNonqaba Polisie, me Nozi van Nozi Communication, Lt Kol Johan Braaff, bevelvoerder van die KwaNonqaba Polisie, mnr Buys van Departement Onderwys en die verteenwoordiger van die KwaNonqaba GPF, Simone Potgieter.
Die KwaNonqaba polisie bevelvoerder, Lt Kol Johan Braaff (middel), en Sers Tomela besoek saam met die verteenwoordiger van die Departement Onderwys, mnr Buys (links), ouers van die Endloveni gemeenskap ter voorbereiding van die 2015 skooljaar.
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
