MOSSELBAAI NUUS - Mosselbaai het 'n nuwe kommissaris vir die Hof vir Klein Eise. Op Dinsdagoggend, 7 Junie, het Mosselbaai se senior landdros, mnr Barry Vermeulen, met die goedkeuring van die ministerie van justisie vir mnr Johan Weideman van Weideman Prokureurs as kommissaris aangestel.
Landdros Vermeulen het mnr Weideman bedank vir sy bereidwilligheid om in belang van geregtigheid 'n gratis gemeenskapsdiens aan die mense van Mosselbaai te bied deur as voorsittende beampte van die Hof van Klein Eise op Mosselbaai op te tree.
Die ander twee kommissarisse is mnr Derick Woods van Woods Prokureurs, en me Kalatmika Lutchman van Herbie Oosthuizen Prokureurs.
Enige persoon, behalwe regspersone soos maatskappye, assosiasies of korporasies, kan 'n geding by die Hof vir Klein Eise aanhangig maak teen enige persoon, instansie, ingesluit maatskappye, korporasies, munisipaliteite of ander entiteite binne die hof se regsgebied, maar uitgesluit die Staat.
Die Hof vir Klein Eise sit gewoonlik na-ure vanaf 17:00 op 'n Dinsdag of Woensdag, ooreenkomstig die datumlys wat van die klerk vir die Hof vir Klein Eise, me Beatrice Mbetha, by die Mosselbaai Landdroshof beskikbaar is.
Eise in die Hof vir Klein Eise mag nie R15 000 oorskrei nie.
'Ons bring jou die nuutste Mosselbaai, Tuinroete nuus'
