Grootskaalse verwoesting weens brande

MOSSELBAAI NUUS - Skaars vier maande na die grootskaalse brande die afgelope Desember, het nóg vernietigende brande die naweek sowat 4 600 hektaar plantegroei uitgewis en is ongeveer 93% van die aangeplante denneplantasie in die Ruiterbos-area verwoes.

Verslae van grootskaalse verliese is oorskadu deur berigte van buurmanskap, kameraderie en amper bomenslike veggees en deursettingsvermoë wat weer eens oor die vlammehel geseëvier het.

Die jongste brande het op Vrydag, 28 April, suid van Engelseberg in die Friemersheim-area ontstaan. Vermoedelik het 'n brand wat twee weke gelede deur weerlig ontstaan het, weens die besondere hoë dagtemperature en bergwindtoestande van die afgelope naweek weer opgevlam.

Sedert Vrydag-laatmiddag tot nog toe het onder meer 650 hektaar van MTO se aangeplante denneplantasie in dié area, duisende hektaar weiding en plantegroei, neutplantasies, ongerepte fynbos, kilometers omheining en etlike diere in die slag gebly.

Friemersheim

Op Friemersheim is lugsteun vroeg Sondagoggend ingespan nadat die brand by tye buite beheer gewoed het en daar gevrees is dat woonhuise in gedrang sou kom. Geen huise in Friemersheim het skade gely nie.

Sowat 137 brandbestryders verbonde aan Mosselbaai se brand- en rampbestuursdienste, die Eden brand- en reddingsdienste, CapeNature, MTO, die Suid-Kaapse brandbeskermingsvereniging Tuinroete en Working on Fire is bygestaan deur grondeienaars en 'n toegewyde span vrywilligers onder aanvoering van Craig Viljoen, 'n plaaslike kenner.

Eden-distriksmunisipaliteit het Woensdag berig dat 107 brandbestryders sedert Sondag tot en met die ter perse gaan die finale brandpunte en opvlammings in Van Niekerkskloof-area bestry.

Eiendomme

Op plase in die Hamelkop- en Leeukloof-area is groot verliese gely terwyl 'n gedeelte van die munisipale plaas naby Friemersheim ook afgebrand het. Hoewel brandspanne en lugsteun deur die Working on Fire-helikopters daarin kon slaag om vyf wonings in die Leeukloof en Eightbells-area te red, is Saterdagaand berig ontvang dat twee woonhuise, twee skure en 'n wendyhuisie wel deur die brande verswelg.

Hoewel sommige roetes by tye slegs vir nooddiensvoertuie toeganklik was, was die hoofroetes deurentyd vir normale verkeer oop. Sommige grondeienaars het self voorbrande probeer maak en is by tye gekniehalter deur die tempo waarteen die brande versprei het.

Die hoof van Mosselbaai brand- en rampbestuursdienste, mnr Joe Johnston, sê die onherbergsame terrein, bergwinde en besondere droë plantmateriaal soos die fynbos wat in 1996 laas gebrand het, het onder meer die brandbestrydingsproses bemoeilik.

Ander voorvalle

Nooddienswerkers moes ook hulp verleen toe twee mense in 'n brand op Saterdag, 29 April om omstreeks 02:00 omgekom het by huise in die Wolwedans-woonbuurt in Groot-Brakrivier. Na wat berig word, het die brand vermoedelik ontstaan toe 'n kers omgeval het.

Daarbenewens het 'n brand Sondag volgens bevestigde inligting weens brandstigting by die vullisoorlaaistasie op Groot-Brakrivier onstaan en moes brandbestryders tot Maandag spook om dit te blus.

Brandspanne moes ook Saterdagnag 'n brand by stoorruimte vir vullis wat vir herwinning bestem is in die Mossdustria industriële area blus. Bewerings van brandstigting in hierdie geval kon nie bevestig word nie.

Brandweerhoof Johnston het aan die Mossel Bay Advertiser gesê al die brandbestryders het 'n besondere taak verrig.

"Daar is egter oomblikke, soos toe 'n man op Friemersheim 'n skinkbord met verversings vir ons bring, wat die werk die moeite werd maak. Die brandweerspanne is oorweldig deur die publiek se goedgesindheid en die gemeenskap word bedank vir hul ruimhartige bydraes; elke botteltjie water, toebroodjie, sjokolade en al die kos word opreg waardeer."

Volgens die munisipale bestuurder, adv Thys Giliomee, was talle van die munisipale raadslede deurentyd betrokke om die brandbestryders en gemeenskappe by te staan en te ondersteun.