Twee mans, waarvan een 'n vuurwapen gehad het, het omstreeks 09:05 by Bayport Financial Services ingestap en geld van die bestuurder geëis. Die onderneming het tans slegs twee permanente werknemers in diens, maar beskik oor verskeie agente wat deeltyds van die kantoor gebruik maak.
Sy vertel dat 'n tweede man by hulle aangesluit het en haar en die skoonmaker na die kombuis gedwing het. Hulle het bly vra dat sy die kluis aan hulle moet uitwys.
Sy meen dat sy kalm was, aangesien die voorval kort na hul oggendgodsdiens plaasgevind het.
"Ek dink die oggend se gebed het my kalm gehou. Ons hou elke oggend godsdiens voor ons met ons dagtaak begin," het sy op die toneel aan die Mossel Bay Advertiser gesê, kort na die voorval.
Area-hoof ook in gedrang
Cheslin Africa, 'n area-bestuurder vir die firma wat op sy maandelikse besoek aan dié tak uit Kaapstad in Mosselbaai was, het die kantoor binnegestap ten tye die rooftog.
"Toe ek instap was daar niemand voor in die kantoor nie, dus het ek solank die register begin invul. Oomblikke later staan daar toe 'n man by my wat my ook na die bestuurder se kantoor dwing waar die bestuurder en skoonmaker aangehou is," het Cheslin vertel.
Aangesien daar geen kontant op die perseel was nie, het die verdagtes persoonlike items soos juwele, 'n selfoon, tabletrekenaars en 'n skootrekenaar van die werknemers afgeneem en daarmee gevlug. Hierna het Henelia die Mosselbaai-polisie geskakel, wat binne minute op die toneel aangekom het.
'n Man wat naby die misdaadtoneel aangetref is, is na die Mosselbaai-polisiestasie geneem vir ondervraging, maar kon nie met die voorval verbind word nie. Verskeie ooggetuies se weergawes is verkry en leidrade word tans opgevolg. Dit blyk asof die mans te voet en toe verder met 'n voertuig gevlug het.
Enige persoon met inligting rakende die voorval, kan die ondersoekbeampte Kst Delport by die Mosselbaai-polisie kontak by 044 606 2850.
CID reageer
Johan van Rensburg, uitvoerende beampte van die CID wat in die sakekern patrollie doen, ten einde die SAPD by te staan in misdaadbekamping, het die voorval verdoem.
Hy het gesê dat die doel van die CID is om die SAPD se 'oë en ore te wees', maar beklemtoon dat hulle uit die aard van die saak nie oral in die sakekern teenwoordig kan wees nie.
Die CID is reeds die afgelope drie jaar aktief in die Mosselbaai-sakekern.
Klik hier vir 'n vorige nuusflits.
ARTIKEL EN FOTO'S: CORNELLE CARSTENS, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
